संगमनेर, प्रतिनिधी:
आमदार सत्यजीत तांबे यांच्या सातत्यपूर्ण पाठपुराव्यामुळे संगमनेर तालुक्यातील ग्रामीण आरोग्य सुविधांमध्ये मोठी सुधारणा होणार आहे. संगमनेरच्या घुलेवाडी येथील सध्याचे ३० खाटांचे ग्रामीण रुग्णालय यापूर्वीच २०२२ मध्ये १०० खाटांच्या अद्ययावत रुग्णालयात श्रेणीवर्जित करण्यात आले असून, या नवीन रुग्णालयाचे बांधकाम सुरू असल्याची माहिती राज्याचे आरोग्य मंत्री प्रकाश आबिटकर यांनी सभागृहात दिली.
आमदार सत्यजीत तांबे यांनी सुरू असलेल्या पावसाळी अधिवेशनात सोमवारी, (१४ जुलै) संगमनेरमधील साकूर आणि घुलेवाडी येथील ग्रामीण रुग्णालयांच्या सद्यस्थितीबद्दल प्रश्न उपस्थित केले होते. त्यांनी सभागृहाच्या निदर्शनास आणले होते की, या रुग्णालयांमध्ये डॉक्टर, कर्मचारी, औषधे आणि उपकरणांची मोठी कमतरता आहे, ज्यामुळे रुग्णांना उपचारात अडचणी येत आहेत. विशेषतः, साकूर येथील ग्रामीण रुग्णालयाच्या इमारतीचे काम रखडलेले असून, सध्या उपलब्ध असलेल्या १५ खाटा अपुऱ्या पडत असल्याने रुग्णांची गैरसोय होत असल्याचे त्यांनी अधोरेखित केले होते.
आमदार तांबे यांच्या प्रश्नांना उत्तर देताना सार्वजनिक आरोग्य विभागाचे मंत्री प्रकाश आबिटकर यांनी स्पष्ट केले की, साकूर आणि घुलेवाडी येथील ग्रामीण रुग्णालये प्रत्येकी ३० खाटांची मंजूर आहेत. तसेच, येथे आवश्यक अधिकारी, कर्मचारी, औषधे व उपकरणे पुरेशा प्रमाणात उपलब्ध आहेत. महत्त्वाचे म्हणजे, १३ ऑगस्ट २०२२ रोजीच्या शासन निर्णयानुसार, घुलेवाडी येथील ३० खाटांचे ग्रामीण रुग्णालय १०० खाटांच्या अद्ययावत रुग्णालयात श्रेणीवर्जित करण्यात आले असून या १०० खाटांच्या रुग्णालयाचे बांधकाम सध्या प्रगतीपथावर असून ते लवकरच पूर्ण होईल. त्यामुळे कामातील विलंबाचा प्रश्न आता उद्भवत नसल्याचेही मंत्र्यांनी स्पष्ट केले.
शासनाच्या या निर्णयामुळे संगमनेर तालुक्यातील आरोग्य सुविधांमध्ये लक्षणीय सुधारणा होण्याची अपेक्षा आहे. घुलेवाडी येथे १०० खाटांचे सुसज्ज रुग्णालय सुरू झाल्यावर परिसरातील नागरिकांना अद्ययावत आरोग्य सेवा मिळण्यास मदत होईल. आमदार सत्यजीत तांबे यांच्या अथक प्रयत्नांना यामुळे यश मिळाल्याचे स्पष्ट झाले आहे.
