महाराष्ट्र संवाद न्यूज ऑनलाईन वृत्त
संगमनेर, प्रतिनिधी:
काँग्रेसचे राष्ट्रीय वर्किंग कमिटीचे सदस्य तथा माजी मंत्री बाळासाहेब थोरात यांच्या पाठपुराव्यामुळे संगमनेर तालुक्यातील नाशिक-पुणे महामार्गावरील इंजिनिअरिंग कॉलेज गेटसमोरील हॉटेल स्टेटसजवळील उड्डाणपुलाचे काम अंतिम टप्प्यात आले आहे. ३८ कोटी रुपये निधीतून साकारत असलेला हा उड्डाणपूल परिसरातील वाहतूक कोंडी कमी करून अपघातांना आळा घालणार असल्याने नागरिकांनी समाधान व्यक्त केले आहे.
माझे घर सोसायटी परिसरातील नागरिकांसाठी हा उड्डाणपूल अत्यंत महत्त्वाचा ठरला आहे. या ठिकाणी होणारे अपघात लक्षात घेता, थोरात यांनी केंद्रीय दळणवळण मंत्री नितीन गडकरी यांच्याकडे पाठपुरावा करून या प्रकल्पासाठी निधी मिळवला होता. सुरुवातीला एका बाजूचे काम पूर्ण झाले असले, तरी दुसऱ्या बाजूचे काम काही कारणास्तव प्रलंबित होते. सप्टेंबर २०२४ मध्ये बाळासाहेब थोरात यांनी पुन्हा पुढाकार घेऊन हे काम वेगाने सुरू केले आणि स्थानिक नागरिकांचे प्रश्नही मार्गी लावले.
आता नाशिक जंक्शनवर दुसऱ्या बाजूचा उड्डाणपूल आणि रस्त्याच्या दोन्ही बाजूंनी बायपासचे काम वेगाने सुरू आहे. हे काम लवकरच पूर्ण होणार असून यामुळे माझे घर सोसायटी, घुलेवाडी ग्रामस्थ, आदर्शनगर, वेल्हाळे, सायखिंडी, चिकणी, मालदाड येथील स्थानिक नागरिकांसह नाशिककडे जाणाऱ्या आणि नाशिकहून संगमनेरकडे येणाऱ्या प्रवाशांची मोठी सोय होणार आहे.
विकासाच्या अनेक प्रकल्पांना थोरातांनी दिली गती- बाळासाहेब थोरात यांनी संगमनेर तालुक्यात अनेक पायाभूत सुविधांच्या विकासाला गती दिली आहे. संगमनेर शहरातील वाहनांची वर्दळ कमी करण्यासाठी त्यांनी तत्कालीन दळणवळण मंत्री सी. पी. जोशी यांच्याकडे पाठपुरावा करून ९ किलोमीटर लांबीचा बिना टोल बायपास मंजूर करून घेतला. २०१४ मध्येच हा बायपास नागरिकांसाठी खुला करण्यात आला, यामुळे शहरातील वाहतूक बाह्यमार्गाने वळवली गेली. याशिवाय, घुलेवाडी-सुकेवाडी बायपासमुळेही वाहतूक कोंडी कमी होण्यास मदत झाली आहे.
संगमनेर शहराच्या सौंदर्यात भर घालणारा इंजिनिअरिंग कॉलेज ते संगमनेर बस स्थानक हा महत्त्वपूर्ण ‘हॅपी हायवे’ रस्ताही त्यांच्या प्रयत्नांतून सुशोभीकरणासह पूर्ण झाला आहे.
नाशिक-पुणे चौपदरीकरण महामार्गही बाळासाहेब थोरात यांच्याच पाठपुराव्यातून पूर्ण झाला आहे. माझे घर सोसायटीजवळील उड्डाणपुलाची मागणी नागरिकांची होती. अपघातांना प्रतिबंध घालण्यासाठी आणि नागरिकांच्या सोयीसाठी त्यांनी हा मोठा उड्डाणपूल मंजूर केला. दिवाळीपूर्वीच त्यांनी या कामाला गती दिल्याने स्थानिक रहिवासी तुषार गोडगे, निखिल गुंजाळ, संतोष पुरी, दीपक पानसरे, संजय रहाणे, रामनाथ सोनवणे, निलेश सांगळे, राजेंद्र पानसरे, मच्छिंद्र ढमाले, अनिल दिघे, रुपेश धारणकर, शरद पानसरे, महेश पानसरे, प्रवीण पानसरे, संजय ढमाले, विक्रम ढमाले आदींनी समाधान व्यक्त करत थोरात यांचे अभिनंदन केले आहे.
