२४ तास उलटले तरी प्रवरा नदीच्या प्रवाहात बेपत्ता झालेल्या तरुणाचा प्रशासनाकडून अद्यापही शोध सुरू, आमदार सत्यजित तांबेंच्या प्रशासनाला सूचना

महाराष्ट्र संवाद न्यूज ऑनलाईन

संगमनेर, प्रतिनिधी: शहरातील प्रवरा नदीच्या पात्रात मंगळवारी रात्रीच्या सुमारास कचरा टाकण्यासाठी गेलेले विजय संभाजी कुटे (वय अंदाजे ४०) हा तोल जाऊन वाहत्या पाण्यात पडल्याने बेपत्ता झाला आहे. या घटनेमुळे संगमनेर शहर आणि परिसरात एकच खळबळ उडाली असून, त्यांचा शोध घेण्यासाठी स्थानिक नागरिक आणि प्रशासन कसून प्रयत्न करत आहेत.

दरम्यान अद्यापही शोध कार्य सुरू असल्याची माहिती संगमनेरचे पोलीस उपअधीक्षक डॉ. कुणाल सोनवणे यांनी दिली आहे.

ही घटना मंगळवारी रात्री सुमारे साडेदहा वाजेच्या दरम्यान प्रवरा नदीवरील छोट्या पुलावर घडली. मूळचे रंगार गल्ली, संगमनेर येथील रहिवासी असलेले विजय कुटे हे आपल्या स्कुटी गाडीवरून कचरा टाकण्यासाठी आले असल्याची माहिती चर्चेत आहे. कुटे आपली दुचाकी गाडी स्टँडवर उभी करत असतानाच त्यांचा पाय स्टँडमध्ये अडकून ते तोल गेल्याने वाहत्या पाण्यात पडले. पाण्याचा प्रवाह जोरदार असल्याने ते काही वेळातच बऱ्याच अंतरावर वाहून गेले आणि त्यानंतर अदृश्य झाले.

या घटनेची माहिती मिळताच परिसरातील नागरिक आणि प्रशासकीय अधिकारी तातडीने घटनास्थळी पोहोचले आणि त्यांनी शोध मोहीम सुरू केली. बुधवारी देखील उशिरापर्यंत हे शोध मोहीम सुरू होती. मात्र, रात्रीचा अंधार आणि नदीतील प्रवाहामुळे बचावकार्यात अडथळे येत आहेत. या घटनेमुळे परिसरात चिंतेचे वातावरण पसरले आहे.

दरम्यान नाशिक पदवीधर मतदारसंघाचे आमदार सत्यजित तांबे यांनी देखील घटनास्थळी भेट देऊन अधिक माहिती घेत शोध कार्याला वेग देण्याच्या सूचना प्रशासनाला दिल्या.