अवैध धंदे आणि बेकायदेशीर स्टोन क्रेशरच्या विरोधात सुरू असलेले उपोषण माजी मंत्री बाळासाहेब थोरात यांच्या मध्यस्थीनंतर मागे; अवैध धंदे तालुक्याची ओळख बिघडवत आहेत

संगमनेर:- 

संगमनेर तालुक्यातील निमोण सोनेवाडी गावातील अवैध धंदे आणि बेकायदेशीर स्टोन क्रेशरच्या विरोधात सुरू असलेले  उपोषण अखेर राज्याचे ज्येष्ठ नेते, माजी मंत्री बाळासाहेब थोरात यांच्या मध्यस्थीनंतर सोमवारी मागे घेण्यात आले आहे. या प्रकरणी दोषींवर तातडीने कारवाई करण्याचे निर्देश थोरात यांनी प्रशासनाला दिले आहेत.

निमोण सोनेवाडी ग्रामसभेने १२ सप्टेंबर २०२२ आणि २७ मे २०२५ रोजी गावात कोणत्याही स्टोन क्रेशरला परवानगी न देण्याचा ठराव केला होता. मात्र, सरपंच, उपसरपंच आणि सदस्यांनी खोट्या मासिक मीटिंग्ज दाखवून जनतेची फसवणूक केली. याविरोधात भागवत बाबूराव सांगळे व त्यांच्या सहकाऱ्यांनी पंचायत समितीसमोर सात दिवसांपासून उपोषण सुरू केले होते.

प्रशासनाचे या रास्त मागणीकडे दुर्लक्ष होत असताना, बाळासाहेब थोरात यांनी मध्यस्थी केली. त्यांच्या हस्तक्षेपानंतरच उपोषणकर्त्यांनी हे आंदोलन मागे घेतले. या वेळी काँग्रेसचे तालुकाध्यक्ष अजय फटांगरे, गटविकास अधिकारी प्रवीण सिनारे, श्रीकांत सांगळे, प्रशांत सांगळे, दिलीप बोंद्रे, रामदास जायभाये, सूर्यभान जायभये आदी उपस्थित होते.

‘अवैध धंदे तातडीने थांबवा’ – थोरात

माजी महसूल मंत्री बाळासाहेब थोरात म्हणाले की, संगमनेरची शांतता आणि सुव्यवस्था काही लोक जाणीवपूर्वक बिघडवत आहेत. शांत असलेला हा तालुका आता अवैध धंद्यांचा तालुका म्हणून ओळखला जाईल की काय, अशी भीती वाटत आहे. नागरिकांनी जागरूक राहावे आणि प्रशासनानेही चुकीच्या गोष्टींना पाठीशी घालू नये, अशा सूचना त्यांनी दिल्या.

‘सत्ताधाऱ्यांमुळे दादागिरी वाढली’ – सांगळे

उपोषणकर्ते भागवत बाबूराव सांगळे यांनी आपले म्हणणे मांडताना सांगितले की, बाळासाहेब थोरात यांनी तालुक्याचा कारभार अत्यंत जबाबदारीने सांभाळला. मात्र, आता नवीन सत्ताधाऱ्यांमुळे गावात दादागिरी वाढली आहे. सोनेवाडीतील अवैध क्रेशरला कायमस्वरूपी परवानगी नाकारली जावी, ही आमची मागणी आहे. जर महायुतीच्या नावाखाली गावामध्ये दहशत निर्माण करणाऱ्यांनी हे प्रकार तातडीने थांबवले नाहीत, तर आत्मदहन करू, असा इशाराही त्यांनी दिला.