संगमनेर – सोमवारी संगमनेर नगर परिषदेचे नगराध्यक्षपद खुल्या महिला प्रवर्गासाठी आरक्षित झाल्यानंतर आता लक्ष बुधवारी होत असलेल्या प्रभागनिहाय आरक्षणाकडे निवडणूक लढवू इच्छिणाऱ्यांचे लक्ष लागले आहे. प्रांताधिकारी अरुण उंडे यांच्या अध्यक्षतेखाली बुधवारी सकाळी साडेदहा वाजता पालिकेच्या सार्वत्रिक निवडणुकीसाठी अनुसूचित जाती (महिला), अनुसूचित जमाती (महिला), नागरिकांचा मागास प्रवर्ग (महिला) व सर्वसाधारण (महिला) आरक्षण निश्चित केले जाणार आहे.
सर्वोच्च न्यायालयाने राज्य सरकारला स्थानिक स्वराज्य संस्थांच्या निवडणुका घेण्याचे निर्देश दिल्यानंतर या प्रक्रियेला सुरुवात झाली आहे. त्यामुळे २०१६ नंतर पुन्हा एकदा पालिका निवडणुकीचा आखाडा रंगणार आहे. आरक्षण निश्चित होताच इच्छुकांकडून मोर्चे बांधणीला सुरुवात होईल. प्रभाग रचना जाहीर झाल्यानंतर प्रत्येक प्रभागातून इच्छुकांची मोठी संख्या समोर येत असली तरी कुठला प्रभाग कोणत्या प्रवर्गासाठी आरक्षित होतो. यावर राजकीय गणित ठरणार आहे. नुकत्याच पार पडलेल्या विधानसभा निवडणुकीनंतर बदललेल्या राजकीय समीकरणांच्या पार्श्वभूमीवर या निवडणुकीला महत्त्व प्राप्त झाले आहे.
१५ प्रभागांमधून ३० जागांसाठी निवडणूक होत आहे. प्रत्येक प्रभागातून दोन नगरसेवकांची पालिकेत वर्णी लागणार असून त्या दृष्टीने अंतिम प्रभाग रचना जाहीर करण्यात आली आहे. संगमनेर नगर परिषदेच्या नगराध्यक्षपदी महिलेची वर्णी लागणार असल्याने संगमनेर नगर परिषदेमध्ये पुन्हा एकदा ‘महिलाराज’ बघावयास मिळणार आहे.
अशातच पालिकेचे मुख्याधिकारी तथा प्रशासक रामदास कोकरे यांची बदली झाल्याने त्यांच्या रिक्त जागेवर अद्याप शासनाकडून कोणाचीही नियुक्ती करण्यात आलेले नाही. त्यामुळे, अकोले नगरपंचायतीच्या मुख्याधिकारी धनश्री पवार यांच्याकडे संगमनेर नगर परिषदेचा अतिरिक्त कार्यभार सोपविण्यात आला आहे. पवार यांनी या पार्श्वभूमीवर संगमनेर नगरपालिका निवडणुकीची सूत्रे हाती घेतली आहे.
बुधवारच्या आरक्षणानंतर संगमनेर नगर परिषदेचे कोणते प्रभाग अनुसूचित जाती (महिला), अनुसूचित जमाती (महिला), नागरिकांचा मागास प्रवर्ग (महिला) व सर्वसाधारण (महिला) प्रवर्गासाठी राखीव होतात याकडे लक्ष लागले आहे. त्यानंतर राखीव प्रभागातील उमेदवार शोधण्याचे मोठे आव्हान सर्व पक्षांसमोर असेल. तर ९ ऑक्टोबर ते १४ ऑक्टोबर दरम्यान यासंदर्भात मुख्याधिकाऱ्यांकडे हरकती दाखल करण्यासाठी मुदत देण्यात आली आहे.
