अहिल्यानगर: आगामी जिल्हा परिषद निवडणुकीच्या पार्श्वभूमीवर अहिल्यानगर जिल्ह्याच्या राजकारणात मोठी उलथापालथ होण्याची चिन्हे आहेत. राष्ट्रवादी काँग्रेस शरदचंद्र पवार पक्षाचे (राष्ट्रवादी शरद पवार गट) युवक जिल्हाध्यक्ष अमित भांगरे यांनी जलसंपदा मंत्री राधाकृष्ण विखे-पाटील यांची शिर्डी येथे भेट घेतल्याने राजकीय वर्तुळात जोरदार चर्चा सुरू झाली आहे.
गेल्या पंधरा दिवसांतील भांगरे आणि विखे-पाटील यांच्यातील ही दुसरी भेट असल्याने अमित भांगरे ‘तुतारी’ सोडून ‘कमळ’ हाती घेणार का, याबद्दल तर्क-वितर्कांना जोर आला आहे.
भांगरे यांनी त्यांच्या आई सुनीता भांगरे यांच्यासह विखे-पाटील यांच्याशी शासकीय विश्रामगृह येथे बंद दाराआड चर्चा केली. या बैठकीला भाजपचे माजी आमदार वैभव पिचड यांचीही उपस्थिती होती.
अहिल्यानगर जिल्हा परिषदेचे आगामी अध्यक्षपद अनुसूचित जमातीच्या महिलेसाठी राखीव झाले आहे. या पार्श्वभूमीवर, अमित भांगरे यांच्या आई सुनीता भांगरे अकोले तालुक्यातून जिल्हा परिषद निवडणूक लढवण्यास इच्छुक आहेत. अध्यक्षपदाचे आरक्षण आणि सुनीता भांगरे यांची तयारी पाहता, त्यांना भाजपच्या माध्यमातून संधी मिळण्याची शक्यता वर्तवली जात आहे.
या भेटींमुळे, ऐन निवडणुकीच्या तोंडावर अमित भांगरे हे शरद पवारांची साथ सोडणार का, अशी चर्चा रंगू लागली आहे. भांगरे लवकरच भाजपमध्ये प्रवेश करतील अशी दाट शक्यता राजकीय गोटात व्यक्त होत आहे, यामुळे शरद पवारांच्या पक्षाला मोठा धक्का बसण्याची शक्यता आहे. विशेष म्हणजे, मागील वर्षी विधानसभा निवडणूक लढवताना भांगरे यांनी अनेक जाहीर सभांमध्ये ‘आम्ही बाप बदलत नाही, माझा राजकीय बाप शरद पवारच’ असे ठामपणे सांगितले होते. मात्र, बदललेल्या राजकीय समीकरणांमुळे आता त्यांच्या भूमिकेत बदल होण्याची शक्यता आहे.
Post Views: 1,385
