संगमनेरच्या केशवतीर्थाला आमदार सत्यजीत तांबे यांच्या प्रयत्नांतून स्मार्ट टच! महिला-पुरुषांसाठी स्वतंत्र ई-टॉयलेट्स आणि चेंजिंग रूम लवकरच

संगमनेर – संगमनेर शहराचा सर्वांगीण विकास गेल्या काही वर्षांपासून सातत्याने होत असून, शहराने आज स्वच्छता, नियोजन आणि आधुनिकतेच्या बाबतीत एक आदर्श स्थान मिळवले आहे. नगरपरिषदेला मिळालेली विविध पारितोषिके हे या यशाचे उत्तम उदाहरण आहे. शहरात वाढत्या नागरिकांच्या वर्दळीचा आणि त्यांच्या सोयींचा विचार करून आमदार सत्यजीत तांबे यांनी संगमनेर शहरातील ई-टॉयलेट्ससाठी फेब्रुवारी २०२५ मध्ये एक कोटी रुपयांचा निधी मंजूर करून आणला होता.

धार्मिक आणि सामाजिक दृष्ट्या महत्त्वाचे ठिकाण असलेल्या प्रवरानदीवरील केशवतीर्थ घाटावर, दहाव्याच्या विधीच्या वेळी महिला व पुरुषांना कपडे बदलण्यासाठी योग्य सुविधा मिळत नव्हत्या. नागरिकांची ही मोठी अडचण लक्षात घेऊन आमदार तांबे यांनी पुढाकार घेतला आहे.

काल (गुरुवार, २३ ऑक्टोंबर) आमदार तांबे यांनी केशवतीर्थ घाट परिसरात ई-टॉयलेट्स व चेंजिंग रूम उभारण्यासाठी दोन ठिकाणांची पाहणी केली. त्यांनी संगमनेर नगरपरिषदेचे अभियंता पंकज मुंगसे यांना बोलावून आपल्या निधीतून केशवतीर्थ परिसरात महिला आणि पुरुषांसाठी तात्काळ दोन स्वतंत्र ई-टॉयलेट्स आणि चेंजिंग रूम उभारण्याच्या सूचना दिल्या.

या सुविधेमुळे केशवतीर्थ येथे धार्मिक विधींसाठी येणाऱ्या नागरिकांना मोठा दिलासा मिळणार असून, घाट परिसर स्वच्छतेच्या आणि सोयीच्या दृष्टीने अधिक सुसज्ज होईल. केशवतीर्थावर उभारल्या जाणाऱ्या या ई-टॉयलेट्समध्ये स्मार्ट सेन्सर तंत्रज्ञान, टचलेस ऑपरेशन सिस्टीम, सोलर लाइटिंग आणि वॉटर रिसायकलिंग युनिट अशा आधुनिक सुविधा असणार आहेत. हे तंत्रज्ञान ई-टॉयलेट्सना स्वच्छ, पर्यावरणपूरक आणि नागरिकांसाठी अधिक सोयीस्कर बनवेल. या अत्याधुनिक सुविधेमुळे घाट परिसर स्वच्छ, आकर्षक आणि पर्यावरणपूरक ठेवण्यास मदत होणार आहे.

शहराच्या क्रीडा संस्कृतीला प्रोत्साहन – याचबरोबर आमदार सत्यजीत तांबे यांनी शहरातील तरुणांसाठी खेळ आणि क्रीडा संस्कृती वाढविण्यासाठी महत्त्वपूर्ण पाऊल उचलले आहे. त्यांनी जोर्वे नाका परिसरात भव्य क्रीडांगण उभारण्यासाठी आणखी एक कोटी रुपयांचा निधी मंजूर केला आहे. या माध्यमातून संगमनेरच्या तरुणाईला दर्जेदार सुविधा मिळणार असून, त्यांच्या प्रतिभेला नवी दिशा मिळेल.