संगमनेर: स्थानिक स्वराज्य संस्थेच्या निवडणुकीच्या पार्श्वभूमीवर संगमनेरमध्ये मोठा राजकीय फेरबदल घडला आहे. नगरपालिका निवडणुकीमध्ये एमआयएम (AIMIM) पक्ष आपले उमेदवार उभे करणार असल्याची व त्यासाठी पक्षप्रमुख माजी खासदार इम्तियाज जलील हे संगमनेरात लवकरच यासंबंधीची घोषणा करणार असल्याची माहिती एमआयएमचे शहराध्यक्ष दानिश मिर्झा यांनी दिली आहे.
आगामी नगरपालिका निवडणुकीत एमआयएमची एन्ट्री झाल्यास राजकीय गणिते बदलू शकतात. नगरसेवकांचे थेट नगराध्यक्ष पदासाठी एमआयएम कडून उमेदवार मैदानात उतरवला जाण्याची चिन्ह निर्माण झाली आहे. यासाठी छत्रपती संभाजीनगरमध्ये नुकत्याच पार पडलेल्या एका बैठकीत संगमनेरचे राष्ट्रवादी काँग्रेसचे माजी नगरसेवक शरीफ शेख यांच्या पत्नीचे नाव चर्चेत आले आहे. शहरात मुस्लिम मतदारांची लक्षणीय संख्या असल्याने एमआयएम पक्षाने ही निवडणूक लढवण्याचा निर्णय घेतला आहे. शहरातील तीन ते चार प्रभागांमध्ये एमआयएमचे उमेदवार उभे करण्यात येणार आहेत.
या पार्श्वभूमीवर, संगमनेर येथील एमआयएमच्या पदाधिकाऱ्यांनी नुकतीच छत्रपती संभाजीनगरचे माजी खासदार इम्तियाज जलील यांची भेट घेऊन त्यांच्यासोबत चर्चा केली आहे. तसेच, एमआयएमच्या सचिवांसोबतही संगमनेरच्या पदाधिकाऱ्यांनी चर्चा केली.
शहराध्यक्ष दानिश मिर्झा यांनी सांगितले की, या पार्श्वभूमीवर पुढील आठवड्यात माजी खासदार इम्तियाज जलील संगमनेर येथेयेणार असून या संबंधीची अधिकृत घोषणा करतील. त्यानंतर मात्र राजकीय हालचाली वाढणार असून एमआयएम कडून नगरसेवकपदासाठी इच्छुकांची संख्या देखील वाढत असल्याचे दिसत आहे. महाविकास आघाडी कडून संधी न मिळाल्यास काहीजण बंडखोरी देखील करण्याची शक्यता नाकारता येत नाही या पार्श्वभूमीवर पालिका निवडणुकीला महत्त्व प्राप्त झाले आहे.
संगमनेरचे नगराध्यक्षपद सर्वसाधारण महिलेसाठी आरक्षित असल्याने या पदासाठी महाविकास आघाडी, महायुतीकडून शहरात विविध नावांची चर्चा सुरू आहे. निवडणुकीतील मुस्लिम मतदारांचे प्राबल्य लक्षात घेता माजी नगरसेवक शरीफ शेख यांनीही आपल्या पत्नीसाठी नगराध्यक्षपदाकरिता प्रयत्न सुरू केले आहेत. शरीफ शेख यांनी एमआयएम पक्षाकडून उमेदवारी केल्यास नगराध्यक्षपदाची निवडणूक चुरशीची होण्याची शक्यता आहे.
एमआयएमच्या बैठकीत मुलाखती आणि उमेदवारीबाबत चर्चा – २१ ऑक्टोबर २०२५ रोजी छत्रपती संभाजीनगर येथे एमआयएम पक्षाच्यावतीने आजी-माजी पदाधिकारी तसेच नगरपालिका, महानगरपालिका, जिल्हा परिषद, पंचायत समितीसाठी संभाव्य उमेदवारांच्या मुलाखतीची बैठक आयोजित करण्यात आली होती. या बैठकीस पश्चिम महाराष्ट्रातील छत्रपती संभाजीनगर, बीड, अहिल्यानगर, जालना, नांदेड, परभणी, हिंगोली या ठिकाणाहून जिल्हाध्यक्ष, तालुकाध्यक्ष आणि इतर पदाधिकारी उपस्थित होते. या बैठकीच्या निमित्ताने संगमनेर शहर आणि तालुक्याच्यावतीने सर्व पदाधिकारी आणि इच्छुक उमेदवारांना घेऊन एक शिष्टमंडळ या बैठकीला हजर होते. नगराध्यक्ष पदासाठी शेख यांच्या पत्नीचे नाव पुढे आला असून त्यांची व नगरसेवक पदासाठी अमजद अब्बास पठाण यांची मुलाखत घेण्यात आली आहे. लवकरच संगमनेर शहरात एमआयएमचे कार्यालय संगमनेर येथे नगरपालिका, जिल्हा परिषद, आणि पंचायत समिती निवडणुकीसाठी इच्छुक उमेदवारांची मुलाखत बैठक आयोजित केली जाईल. वेळ आणि दिवस ठरल्यानंतर सर्वांना कळवले जाईल, अशी माहिती उत्तर नगर जिल्हा समन्वयक इम्रानभाई देशमुख आणि संगमनेर शहर समन्वयक दानिश मिर्झा यांनी दिली.
संगमनेरच्या राजकारणात मोठा फेरबदल…! महायुती आणि महाविकास आघाडीसाठी धोक्याची घंटा, ‘एमआयएम’ नगरपालिकेसह जिल्हा परिषद पंचायत समिती निवडणुकीत उतरणार; नगराध्यक्षपदासाठी उमेदवार निश्चित
आगामी नगरपालिका निवडणुकीत एमआयएमची एन्ट्री झाल्यास राजकीय गणिते बदलू शकतात. नगरसेवकांचे थेट नगराध्यक्ष पदासाठी एमआयएम कडून उमेदवार मैदानात उतरवला जाण्याची चिन्ह निर्माण झाली आहे.
