‘राहुल गांधी समर्थक संघ’ (RGSS) आक्रमक; डॉ. संपदा मुंडे हत्या प्रकरणात राजकीय दबाव झुगारून दोषींवर कारवाईची मागणी

संगमनेर – फलटण येथील वैद्यकीय अधिकारी डॉ. संपदा मुंडे यांच्या कथित हत्या प्रकरणातील दोषींवर तात्काळ आणि कठोर कारवाई करण्यात यावी, तसेच पोलीस अधिकारी आणि राजकीय व्यक्तींकडून होणारा दबाव व महिलांवरील अत्याचाराविरोधात प्रशासकीय सुधारणा करावी, अशा मागण्यांचे निवेदन ‘राहुल गांधी समर्थक संघ, महाराष्ट्र’ यांच्यावतीने काल (मंगळवार २८ ऑक्टोंबर) संगमनेर शहर पोलीस निरीक्षक रवींद्र देशमुख यांना देण्यात आले.

डॉ. संपदा मुंडे यांनी आत्महत्या करण्यापूर्वी लिहिलेल्या चिठ्ठीत पोलीस उपनिरीक्षक गोपाल बदने याच्यावर बलात्कार केल्याचा, तसेच प्रशांत बनकर व इतरांकडून शारीरिक व मानसिक छळ सहन करावा लागल्याचा गंभीर आरोप केलेला आहे. महिलांविरोधातील गुन्हे रोखण्याची आणि महिलांना कायदेशीर संरक्षण देण्याची जबाबदारी असणाऱ्या पोलीस यंत्रणेतील अधिकाऱ्यांवरच असे गंभीर आरोप होणे, ही कायदा व सुव्यस्थेच्या दृष्टीने अतिशय चिंताजनक बाब असल्याचे ‘राहुल गांधी समर्थक संघाने’ निवेदनात स्पष्ट केले आहे.

या प्रकरणातील आरोपींना संरक्षण देण्यासाठी माजी खासदार रणजित नाईक निंबाळकर, त्यांचे स्वीय्य सहाय्यक राजेंद्र शिंदे, आणि रोहित नागतिळे यांनी दबाव टाकल्याची गंभीर बाबही ‘राहुल गांधी समर्थक संघाने’ निदर्शनास आणली आहे. पीडित डॉ. मुंडे यांच्या कुटुंबानेही या प्रकरणात राजकीय हस्तक्षेप आणि दडपशाही होत असल्याचा गंभीर आरोप करत तातडीने न्याय मिळण्याची अपेक्षा व्यक्त केली आहे.

या सर्व पार्श्वभूमीवर, भविष्यात कोणत्याही महिला अधिकारी किंवा कर्मचाऱ्यावर अशी गंभीर परिस्थिती ओढवू नये यासाठी पोलीस प्रशासनात आवश्यक सुधारणा करण्यात याव्यात आणि संबंधित अधिकाऱ्यांनी त्याबाबतचे आदेश त्वरित जारी करावेत, अशी मागणी ‘राहुल गांधी समर्थक संघाने’ केली आहे. तसेच, सदर मागण्यांचे निवेदन अहिल्यानगर जिल्हा पोलीस अधिक्षक यांच्यामार्फत सातारा पोलीस आयुक्त यांच्यापर्यंत योग्य तो पत्रव्यवहार करून कळविण्यात यावे, अशी विनंतीही संघाने केली आहे.

हे निवेदन ‘राहुल गांधी समर्थक संघ महाराष्ट्र’च्या वतीने अमोल शेलकर, राम अरगडे, प्रकाश कडलग, सतीश खताळ, मोहसीन शेख, कल्याण जोर्वेकर, अरुण गावित्रे, अक्षय मोहिते, शंतनू भालेकर, अनिल राऊत, भरत कळसकर आदी कार्यकर्त्यांनी दिले आहे.