संगमनेर – संगमनेर तालुक्यातील विविध गावांसह तीर्थस्थळांच्या पर्यटन विकासासाठी व सुशोभीकरणासाठी मिळालेला मोठा निधी हा माजी मंत्री बाळासाहेब थोरात यांच्या मार्गदर्शनाखाली आमदार सत्यजित तांबे यांनी केलेल्या पाठपुराव्याचे फलित आहे, असे स्पष्ट मत युवक काँग्रेसचे जिल्हा उपाध्यक्ष सुभाष सांगळे यांनी व्यक्त केले आहे.
प्रसिद्धी पत्रकात त्यांनी म्हटले आहे की, बाळासाहेब थोरात यांच्या नेतृत्वाखाली पर्यटन विभागाचा निधी सातत्याने तालुक्याला मिळाला आहे. मागील वर्षी ऑक्टोबर 2024 पूर्वी आमदार सत्यजित तांबे यांनी विविध गावांकरता निधीची मागणी केली होती.
उदाहरणार्थ, देवकौठे येथील जगदंबा माता परिसर सुशोभीकरण व घाट यासाठी दोन कोटी रुपयांचा निधी आमदार तांबे यांनी 8 ऑगस्ट 2024 रोजी तत्कालीन पर्यटन मंत्री गिरीश महाजन यांच्याकडे मागितला होता. हा प्रस्ताव 12 सप्टेंबर 2024 रोजी मंत्रालयात पारित झाला होता, मात्र आचारसंहिता व निधीअभावी तो मिळू शकला नाही.
सांगळे यांनी नमूद केले की, सध्या मिळत असलेला निधी हा तांबे यांच्या मागील वर्षाच्या पाठपुराव्यातून आलेला आहे. नवीन लोकप्रतिनिधी हे फक्त पत्र देऊन मंत्र्यांसमवेत फोटो काढत आहेत. हे तालुक्यातील सर्व जनतेला माहित आहे. नवीन लोकप्रतिनिधी फक्त पत्रके काढून श्रेय घेत आहेत; त्यांच्या प्रयत्नातून अद्याप एक रुपयाचाही निधी आलेला नाही. नवीन लोकप्रतिनिधींनी नवीन निधी मिळवून मग पत्रकबाजी करावी, असे आवाहन त्यांनी केले.
या निधी मिळण्याचे श्रेय हे माजी मंत्री बाळासाहेब थोरात व आमदार सत्यजित तांबे यांचेच आहे, असे देवकौठे येथील जगदंबा माता मंदिराच्या कामासाठी पाठपुरावा करणारे राजेंद्र कहांडळ यांनीही स्पष्ट केले आहे.
मागील वर्षाच्या पाठपुराव्याचे फलित – संगमनेर तालुक्याला मिळालेला पर्यटन निधी हा सत्यजित तांबे यांच्या कामाचा परिणाम; युवक काँग्रेसचा दावा
या निधी मिळण्याचे श्रेय हे माजी मंत्री बाळासाहेब थोरात व आमदार सत्यजित तांबे यांचेच आहे, असे देवकौठे येथील जगदंबा माता मंदिराच्या कामासाठी पाठपुरावा करणारे राजेंद्र कहांडळ यांनीही स्पष्ट केले आहे.
