संगमनेर, प्रतिनिधी –
संगमनेर तालुक्यात मागील काही महिन्यांपासून सुरू असलेल्या ‘अमली पदार्थ’ प्रकरणावरून राजकीय वातावरण कमालीचे तापले आहे. या प्रकरणावरून आमदार अमोल खताळ यांच्यावर काँग्रेसने अत्यंत गंभीर आरोप करत त्यांचे सभागृहातील वक्तव्य आणि सोशल मीडियावर प्रसारित झालेले व्हिडिओ ‘छेडछाड’ केलेले असल्याचा सनसनाटी दावा केला आहे. मूळ व्हिडिओ आणि फोटो पत्रकार परिषदेत सादर करत काँग्रेसच्या नेत्यांसह संबंधित युवकांनी या व्हिडिओची पोलखोल करत खताळ यांच्यावर जोरदार निशाणा साधला आहे.
नवीन लोकप्रतिनिधी आमदार खताळ समर्थकांकडून ‘खोटे व्हिडिओ बनवण्याचा उद्योग’ सुरू असून, यामुळे निष्पाप तरुणांचे आयुष्य उद्ध्वस्त होत आहे. हा उद्योग त्वरित बंद करा, अन्यथा तालुक्यातील तरुणाईच्या प्रचंड उद्रेकाला सामोरे जावे लागेल, असा संतप्त इशाराच व्हिडिओ बाधित युवकांनी दिला आहे.
खोट्या व्हिडिओचे पितळ उघडे! – यशोधन जनसंपर्क कार्यालयात आयोजित पत्रकार परिषदेत राज्य साखर संघाचे उपाध्यक्ष बाबा ओहोळ, तालुकाध्यक्ष अजय फटांगरे, शहराध्यक्ष सोमेश्वर दिवटे यांच्यासह मूळ व्हिडिओतील युवक साईराज कांदळकर, सार्थक कांदळकर, आणि अक्षय दिघे उपस्थित होते.
नेमकं काय घडलं? – नागपूर अधिवेशनादरम्यान आमदार खताळ यांच्या यंत्रणेमार्फत काही व्हिडिओ समाज माध्यमांमध्ये पसरवण्यात आले. यामध्ये जे युवक ‘गांजा तस्कर’ म्हणून दाखवण्यात आले, ते तळेगाव दिघे येथील आहेत. या युवकांनी नवीन ‘थार’ गाडी घेतल्यानंतर गणेश सहकारी साखर कारखान्याच्या निवडणूक निकालानंतर तिच्या पूजनासाठी आणली होती. यावेळी लोकनेते बाळासाहेब थोरात, खासदार निलेश लंके, आणि माजी आमदार डॉ. सुधीर तांबे हे उपस्थित होते.
युवकांनी पूजनाच्या वेळचे मूळ व्हिडिओ आणि फोटो पत्रकार परिषदेत सादर केले. खताळ यांच्या यंत्रणेने फिरवलेल्या व्हिडिओमध्ये ‘तुषार पडवळ’ नावाचा जो व्यक्ती दाखवला आहे, तो प्रत्यक्षात सार्थक कांदळकर असल्याचे उघड झाले आहे.
बहिणीच्या लग्नात पाहुण्यांनी विचारले, तू गांजा विकतोस का? – व्हिडिओमुळे झालेल्या मनस्तापाबद्दल बोलताना सार्थक कांदळकर याने तीव्र भावना व्यक्त केल्या. तो म्हणाला, माझ्या बहिणीचे लग्न होते आणि त्याच दिवशी हा व्हिडिओ बाहेर आला. लग्नासाठी आलेल्या नवीन पाहुण्यांनी थेट मला, ‘तू गांजाचा व्यवसाय करतो की काय?’ असा प्रश्न विचारण्यास सुरुवात केली. यामुळे माझ्या घरच्यांना आणि मला प्रचंड मनस्ताप झाला. हे माझे आयुष्य उद्ध्वस्त करण्याचे षड्यंत्र आहे.
साईराज कांदळकर यांनी सांगितले की, बाळासाहेब थोरात व आमच्या घरचे यांचे आमच्यावर चांगले संस्कार आहेत. आम्ही कधीही वाईट मार्गाला गेलो नाही. कष्टाने काम करतो. कृपया अशी खोटी बदनामी थांबवा.
खोटे बोलून तालुक्याची बदनामी करणे थांबवा – बाबा ओहोळ यांनी आमदार खताळ यांच्यावर कडक शब्दांत टीका केली. ते म्हणाले, संगमनेर तालुक्याला चांगल्या आणि सुसंस्कृत राजकारणाची परंपरा आहे. मात्र, नवीन आमदार खताळ खोट्या व्हिडिओच्या माध्यमातून जाणीवपूर्वक तालुक्याची बदनामी करत आहेत. संधी मिळाली तर तुम्ही विकास कामे करा, निधी आणा, पण खोट्या गोष्टी दाखवून बदनामी करू नका, अन्यथा तालुका तुम्हाला माफ करणार नाही.
अजय फटांगरे यांनीही खोट्या फोटो आणि व्हिडिओमुळे होणारी तालुक्याची बदनामी तालुक्यातील युवक कधीही सहन करणार नाही, असा इशारा दिला.
बदनामीविरोधात पोलीस तक्रारीची तयारी – या संपूर्ण प्रकरणाची गंभीरता लक्षात घेऊन, सोशल मीडियावर झालेल्या बदनामीच्या विरोधात सर्व बाधित युवकांनी पोलीस तक्रार दाखल करणार असल्याचे यावेळी स्पष्ट केले. दरम्यान, पत्रकार परिषदेनंतर तुषार पडवळ नावाचा उल्लेख असलेला कार्यकर्ता हा अमोल खताळ यांचाच कार्यकर्ता असल्याचे व्हिडिओमध्ये स्पष्ट झाल्याचा दावा काँग्रेस नेत्यांनी एका फोटोच्या माध्यमातून केला आहे.
📌 थोरात-संगमनेरच्या बदनामीचा राज्यातून निषेध!
राज्यातील मोठ्या नेत्यांच्या सभोवती कायम तरुण कार्यकर्त्यांचा गराडा असतो. राजकीय नेते कार्यकर्त्यांना सहसा नाराज करत नाहीत. मात्र, चुकीचे फोटो दाखवून संगमनेरचे आमदार खताळ यांनी केलेली संगमनेरची बदनामी राज्य सहन करणार नाही. तसेच, लोकनेते बाळासाहेब थोरात यांच्या आणि संगमनेर तालुक्याबद्दल टिपणी करणाऱ्या प्रवृत्तीचा राज्यभरातून निषेध होत असल्याचे बाबा ओहोळ यांनी यावेळी सांगितले.
