जवळेकडलगमध्ये आत्तापर्यंत तीन बिबटे जेरबंद, चिमुकल्या सिद्धेशच्या मृत्यूनंतर वनविभाग ॲक्शन मोडमध्ये! काळजाचा ठोका चुकवणारी मोहीम, ‘डॉट’ मारून एकाला पकडले तर दुसरा पिंजऱ्यात जेरबंद

संगमनेर | महाराष्ट्र संवाद न्यूज

संगमनेर तालुक्यातील जवळेकडलग परिसरात गेल्या काही दिवसांपासून निर्माण झालेली बिबट्याची दहशत कमी करण्यासाठी वनविभागाला मोठे यश आले आहे. वनविभागाच्या रेस्क्यू टीमने अत्यंत धाडसी मोहीम राबवत आतापर्यंत तीन बिबट्यांना जेरबंद केले. सुरुवातीला घटनेच्या दुसऱ्या दिवशी पकडण्यात आलेल्या बिबट्यानंतर पुन्हा एका बिबट्याला गुंगीचे औषध (डॉट) देऊन पकडण्यात आले, तर एक बिबट्या वनविभागाने लावलेल्या पिंजऱ्यात अडकला. त्यामुळे पकडलेल्या बिबट्यांची संख्या जवळेकडल मध्ये तीन वर गेली आहे.

काही दिवसांपूर्वी जवळेकडलग येथील अवघ्या चार वर्षांच्या सिद्धेश कडलग या चिमुकल्याचा बिबट्याच्या हल्ल्यात दुर्दैवी मृत्यू झाला होता. या घटनेने संपूर्ण जिल्हा हादरला असून ग्रामस्थांमध्ये संतापाचे वातावरण होते. शासनाने या घटनेची गंभीर दखल घेत नरभक्षक बिबट्याला ठार मारण्याचे आदेश दिले होते. मात्र, वनविभागाच्या रेस्क्यू टीमने तंत्रज्ञानाचा आणि कौशल्याचा वापर करून बिबट्याला जिवंत पकडण्यात यश मिळवले.

गेल्या काही दिवसांपासून वनविभागाचे पथक या भागात तळ ठोकून होते. शुक्रवारी राबवण्यात आलेल्या शोध मोहिमेत रेस्क्यू टीमला एक बिबट्या दिसून आला, त्याला तातडीने ‘डॉट’ मारून बेशुद्ध करण्यात आले. त्याचवेळी परिसरात लावलेल्या पिंजऱ्यात दुसरा बिबट्या अडकल्याचे समोर आले. पकडण्यात आलेले दोन्ही बिबटे मादी जातीचे असून त्यांचे वय अंदाजे दीड ते दोन वर्ष आहे.

ही मोहीम नाशिकचे सहाय्यक वनसंरक्षक अमरजीत पवार, वनक्षेत्रपाल सागर केदार यांच्या मार्गदर्शनाखाली वन अधिकारी आणि कर्मचाऱ्यांच्या पथकाने फत्ते केली. आतापर्यंत तीन बिबटे जेरबंद झाल्याने जवळेकडलग परिसरातील नागरिकांनी सुटकेचा नि:श्वास टाकला असला, तरी परिसरात अजूनही इतर बिबट्यांचा वावर असण्याची शक्यता असल्याने वनविभागाने शोध मोहीम सुरूच ठेवली आहे.