संगमनेर | महाराष्ट्र संवाद न्यूज-
राजकारणात विजय मिळाला की गुलालाची उधळण आणि गल्लोगल्ली फ्लेक्स लावून शक्तिप्रदर्शन करण्याची परंपरा आहे. मात्र, संगमनेरमध्ये या परंपरेला छेद देत एक नवा आदर्श निर्माण करण्यात आला आहे. माजी मंत्री लोकनेते बाळासाहेब थोरात आणि आमदार सत्यजित तांबे यांनी दिलेल्या सूचनेचे तंतोतंत पालन करत, सेवा समितीने ऐतिहासिक विजयानंतरही एकही फ्लेक्स न लावण्याचा निर्णय घेतला आहे. यामुळे शहरातील बसस्थानक परिसर आणि मुख्य रस्त्यांनी अक्षरशः ‘मोकळा श्वास’ घेतला असून, केवळ फ्लेक्सबाजी करणाऱ्या पुढाऱ्यांना ही मोठी चपराक मानली जात आहे.
शब्दाला जागले आमदार!- निवडणूक प्रचारादरम्यान आमदार सत्यजित तांबे यांनी शहराचे विद्रूपीकरण थांबवण्याचे आश्वासन दिले होते. केवळ आश्वासनच दिले नाही, तर दिवाळीपूर्वी त्यांनी स्वतःचे फ्लेक्स स्वतः काढून एक आदर्श घालून दिला होता. संगमनेर सेवा समितीच्या नगराध्यक्ष डॉ. मैथिलीताई तांबे आणि २७ नगरसेवकांनी राज्यात अव्वल ठरेल असा विक्रमी विजय मिळवला. इतका मोठा विजय मिळाल्यानंतरही शहरात कुठेही फ्लेक्सबाजी न करता सेवा समितीने आपले पहिले वचन पूर्ण केले आहे.
फ्लेक्सबाज पुढाऱ्यांचे ‘दुकान’ बंद!- मागील वर्षभरात संगमनेर शहरात, विशेषतः हायटेक बसस्थानक परिसरात फ्लेक्समुळे मोठ्या प्रमाणावर विद्रूपीकरण झाले होते. ज्यांचे समाजकार्यात शून्य योगदान आहे, अशा काही ‘फ्लेक्सबाज’ पुढाऱ्यांनी शहरात बॅनरची चढाओढ लावली होती. सत्ताधाऱ्यांच्या दबावामुळे प्रशासनानेही याकडे दुर्लक्ष केले होते.
याबाबत संगमनेरमधील अनेक समाजसेवी संघटना, बस स्थानकावरील गाळेधारक, युवक संघटना यांनीही वेळोवेळी आंदोलने केली मात्र सत्ताधाऱ्यांनी दमदाटी करून फ्लेक्स तसेच ठेवले. अगदी माजी मंत्री बाळासाहेब थोरात यांच्या निवासस्थानाकडे जाणाऱ्या रस्त्यावरील कमानीवरही मुद्दाम फ्लेक्स लावून संगमनेरकरांच्या भावना दुखावण्याचे काम झाले होते. मात्र, आमदार तांबे यांनी प्रशासनाला अनधिकृत फ्लेक्सवर कारवाईच्या सूचना देताच या हौशी पुढाऱ्यांना मोठी चपराक बसली आहे.
नागरिकांकडून कौतुकाचा वर्षाव- कोणतेही विकासकाम न करता केवळ फ्लेक्सवर चमकणाऱ्या नेत्यांना जनतेने नाकारले आहे. शहरातील अनेक युवक आणि समाजसेवी संस्थांनी या निर्णयाचे स्वागत केले आहे. “काम बोलतं, फ्लेक्स नाही,” अशा प्रतिक्रिया आता संगमनेरमधून उमटत आहेत.
कोणतेही विकास काम न करता फक्त फ्लेक्स बाजी करणे किंवा कोणत्याही समाजकार्यात योगदान न देता सामाजिक कार्यकर्ता म्हणून फ्लेक्स लावणे हा मोठा उद्योग संगमनेरमध्ये सुरू झाला होता. अनेक भाऊ, दादांसोबत गल्लीत, घरात योगदान नसलेले अनेक फ्लेक्स स्वयंघोषित पुढारी रस्त्यावर फ्लेक्सच्या रूपाने अवतरल्याचे दिसत होते. शहरातील प्रमुख रस्त्यांवर या फ्लेक्स पुढाऱ्यांनी मोठी गर्दी केली होती. एकमेकांच्या फ्लेक्स वर फ्लेक्स लावण्याची मोठी चढाओढ देखील बघावयास मिळत होती. यावर आमदार सत्यजित तांबे यांनी अनधिकृत कोणाचाही फ्लेक्स लागणार नाही अशी सूचना प्रशासनाला केली. यामुळे अशा फ्लेक्सबाज पुढार्यांना मोठी चपराक मिळाली आहे. आता हे चित्र कायमस्वरूपी राहो! अशी अपेक्षा सुज्ञ संगमनेरकर व्यक्त करत आहे.
