संगमनेर, प्रतिनिधी –
स्त्री स्वतःचे आणि समाजाचे भविष्य घडवते, या विचारांना स्मरून मी संगमनेरच्या सेवेसाठी सज्ज आहे, असे भावनिक उद्गार संगमनेरच्या नवनियुक्त नगराध्यक्षा डॉ. मैथिली तांबे यांनी काढले. संगमनेर नगरपालिकेच्या नगराध्यक्ष पदाचा पदभार स्वीकारल्यानंतर आयोजित सभेत त्या बोलत होत्या.
प्रियदर्शनी इंदिरा गांधी भवनांमध्ये संगमनेर नगर परिषदेच्या नवनिर्वाचित नगराध्यक्ष डॉ. मैथिली सत्यजित तांबे यांनी नगराध्यक्ष खुर्चीवर बसून आपला पदभार स्वीकारला. यावेळी झालेल्या कार्यक्रम प्रसंगी माजी मंत्री बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, माजी नगराध्यक्ष दुर्गा तांबे, उद्योगपती राजेश मालपाणी, मनीष मालपाणी, गिरीश मालपाणी, जर्मनीच्या माजी खासदार क्लोडिया नॉलटे, रणजितसिंह देशमुख, डॉ. जयश्री थोरात, नगरपालिकेचे मुख्याधिकारी दयानंद गोरे आदी उपस्थित होते.
तांबे म्हणाल्या, संगमनेरकरांनी दिलेला विश्वास ही माझ्यासाठी खूप मोठी जबाबदारी आहे. मी येथे केवळ एक व्यक्ती म्हणून नाही, तर संगमनेरमधील प्रत्येक कुटुंबाची प्रतिनिधी म्हणून उभी आहे. संगमनेरच्या सुनेला तुम्ही मुलीसारखे प्रेम देऊन या ऐतिहासिक शहराचा प्रथम नागरिक केले आहे, त्याबद्दल मी तुमची ऋणी आहे, असेही त्यांनी नमूद केले. त्यांच्या मते, हे पद केवळ मान-सन्मान नसून जनतेची सेवा करण्याची एक मोठी संधी आहे.
संगमनेर नगरपालिकेचे ‘जनसेवा हीच ईश्वर सेवा’ हे ब्रीदवाक्य सत्यात उतरवण्यासाठी आपली संपूर्ण टीम कटिबद्ध असेल, असे आश्वासन त्यांनी दिले. कोणत्याही प्रकारचा भेदभाव न करता प्रत्येक नागरिकाची अडचण ही स्वतःची समजून सोडवण्यावर त्यांचा भर राहणार आहे.
शहराच्या सर्वांगीण विकासासाठी त्यांनी ‘संगमनेर २.०’ ही संकल्पना मांडली. लोकनेते बाळासाहेब थोरात, डॉ. सुधीर तांबे, सौ. दुर्गाताई तांबे आणि आमदार सत्यजित तांबे यांच्या मार्गदर्शनाखाली ही विकासाची संकल्पना प्रत्यक्ष अमलात आणली जाईल, असा विश्वास त्यांनी व्यक्त केला.
आपल्या भाषणाची सुरुवात आणि शेवट करताना त्यांनी सावित्रीबाई फुले, राजमाता जिजाऊ, पुण्यश्लोक अहिल्याबाई होळकर, झाशीची राणी लक्ष्मीबाई, मदर तेरेसा, रमाबाई आंबेडकर आणि फातिमा शेख यांसारख्या थोर व्यक्तिमत्त्वांना अभिवादन करून स्त्रीशक्तीचा गौरव केला.
या कार्यक्रमाला संगमनेरमधील नागरिक, पदाधिकारी आणि कार्यकर्ते मोठ्या संख्येने उपस्थित होते. सर्वांनी डॉ. मैथिली तांबे यांना त्यांच्या पुढील वाटचालीस शुभेच्छा दिल्या.
