थेट फोन करा, आपल्यात कोणताही ‘पीए’ येणार नाही; संगमनेरात विधान परिषद सभापती प्रा. राम शिंदेंचा कार्यकर्त्यांना मोठा शब्द

संगमनेर, प्रतिनिधी – 

तुम्ही मला कधीही फोन किंवा मेसेज करा, मी स्वतः त्याला उत्तर देईन. माझ्या आणि तुमच्या संवादामध्ये कोणताही पीए (खाजगी सचिव) येणार नाही, अशा शब्दांत महाराष्ट्र विधान परिषदेचे सभापती प्रा. राम शिंदे यांनी संगमनेरमधील भाजप कार्यकर्त्यांना आश्वस्त केले. हल्ली कार्यकर्ते सभापतींचा फोनही उचलत नाहीत, असा मिश्किल टोला लगावत त्यांनी जुन्या आणि निष्ठावान कार्यकर्त्यांना मोठा आधार दिला.

सोमवारी पुण्याहून कोपरगावला एका सोहळ्यासाठी जात असताना प्रा. शिंदे यांनी संगमनेर येथील शासकीय विश्रामगृहात थांबून भाजप पदाधिकारी व कार्यकर्त्यांशी संवाद साधला. यावेळी त्यांनी कार्यकर्त्यांच्या मनातील शंका दूर करत त्यांना सक्रिय होण्याचे आवाहन केले.

सभापती असलो तरी आधी कार्यकर्ताच- निवडणुकीतील पराभवानंतरही पक्षाने कामाची दखल घेऊन सभापती पद दिले, हे नमूद करत शिंदे म्हणाले की, मी आज मोठ्या पदावर असलो तरी मुळात मी एक सामान्य कार्यकर्ता आहे. माझ्या कार्यालयाची दारे कार्यकर्त्यांसाठी २४ तास उघडी आहेत. सत्तेच्या काळात कार्यकर्त्यांना डावलले जाणार नाही, अशी ग्वाही त्यांनी यावेळी दिली.

जुन्या कार्यकर्त्यांची ‘खदखद’ आणि शिंदेंचे आश्वासन- यावेळी भाजप नेते जालिंदर वाकचौरे यांनी कार्यकर्त्यांच्या मनातील भावना मांडल्या. संघर्षाच्या काळात पक्षाचा झेंडा खांद्यावर घेणाऱ्या जुन्या कार्यकर्त्यांना सत्तेत योग्य मानसन्मान मिळावा, अशी मागणी त्यांनी केली. यावर भाष्य करताना राम शिंदे म्हणाले की, पक्षाचा डोलारा हा निष्ठावान कार्यकर्त्यांवरच उभा असतो. जुन्या कार्यकर्त्यांवर कोणताही अन्याय होऊ दिला जाणार नाही, त्यांच्या अडीअडचणी सोडवण्यासाठी मी कटिबद्ध आहे.

जनसामान्यांची कामे करा- राज्यात आणि देशात भाजपचे सरकार असल्याने कार्यकर्त्यांनी या ताकदीचा वापर जनसामान्यांचे प्रश्न सोडवण्यासाठी करावा, असा सल्लाही त्यांनी दिला. या बैठकीमुळे संगमनेर भाजपमध्ये नवा उत्साह संचारल्याचे पाहायला मिळाले.

या बैठकीला जालिंदर वाकचौरे, भरत फटांगरे, दीपक भगत, ज्ञानेश्वर कर्पे, वैभव लांडगे, पायल ताजणे, विठ्ठल शिंदे, काशिनाथ पावसे, राजेंद्र सांगळे यांच्यासह तालुक्यातील प्रमुख पदाधिकारी व कार्यकर्ते मोठ्या संख्येने उपस्थित होते.