संगमनेर –
विश्वासाचा फायदा घेऊन जनावरे खरेदी केल्यानंतर त्याचे पैसे न देता एका व्यापाऱ्याची ३ लाख ४१ हजार रुपयांची फसवणूक केल्याचा प्रकार संगमनेरमध्ये उघड झाला आहे. याप्रकरणी संगमनेर शहर पोलीस ठाण्यात जुनेद अहमद कुरेशी, यासीन अहमद कुरेशी आणि अहमद अब्बास कुरेशी (सर्व रा. कळंब, ता. मुरबाड, जि. कल्याण) या तिघांविरुद्ध फसवणूक व धमकी दिल्याप्रकरणी गुन्हा दाखल करण्यात आला आहे.
फिर्यादी जब्बार हसन शेख (वय ५०, रा. अलकानगर, संगमनेर) हे ग्रामीण भागातून शेळ्या-मेंढ्या खरेदी करून विक्री करण्याचा व्यवसाय करतात. त्यांच्या ओळखीचा व्यापारी जुनेद अहमद कुरेशी याने १ ऑगस्ट २०२४ रोजी शेख यांच्या शेडवर येऊन २ लाख रुपयांची जनावरे खरेदी केली. जुन्या ओळखीमुळे शेख यांनी हा माल उधारीवर दिला. मात्र, वारंवार पैसे मागूनही जुनेदने टाळाटाळ केली आणि शेवटी ‘पैसे देणार नाही’ असे म्हणत उद्धटपणाची भाषा वापरली.
काही दिवसांनी जुनेदचा भाऊ यासीन अहमद कुरेशी आणि वडील अहमद अब्बास कुरेशी हे फिर्यादीच्या घरी आले. मागचे पैसे आम्ही थोडे थोडे करून देऊन टाकू, तुम्ही पुन्हा आमच्याशी व्यवहार सुरू करा, असे सांगून त्यांनी शेख यांचा विश्वास संपादन केला. त्यांच्या सांगण्यावरून १४ सप्टेंबर २०२४ रोजी शेख यांनी अन्य शेतकऱ्यांकडून घेतलेली १ लाख ४१ हजार रुपयांची जनावरे त्यांच्या गाडीत (MH 10 CR 5356) भरून दिली.
दोन दिवसात पैसे देण्याचे कबूल करूनही जुनेद अहमद कुरेशी, यासीन अहमद कुरेशी आणि अहमद अब्बास कुरेशी यांनी पैसे दिले नाहीत. फिर्यादीने जेव्हा पैशांसाठी तगादा लावला, तेव्हा या तिघांनीही फिर्यादीला आई-बहिणीवरून अर्वाच्य शिवीगाळ करत जास्त त्रास देऊ नको, नाहीतर तिथे येऊन तुला पाहून घेऊ, अशी जीवे मारण्याची धमकी दिली.
अखेर ३ लाख ४१ हजार रुपयांची फसवणूक झाल्याचे लक्षात आल्यावर जब्बार शेख यांनी दिलेल्या फिर्यादीवरून संगमनेर शहर पोलिसांनी जुनेद अहमद कुरेशी, यासीन अहमद कुरेशी आणि अहमद अब्बास कुरेशी यांच्याविरुद्ध भारतीय न्याय संहिता (BNS) २०२३ च्या कलम ३१८(४), ३५१(२) आणि ३५२ अन्वये गुन्हा दाखल केला आहे. या प्रकरणाचा पुढील तपास पोलीस उपनिरीक्षक रावसाहेब लोखंडे करत आहेत.
