नगराध्यक्षा मैथिलीताई तांबे यांची ‘नवी टीम’ सज्ज; दिपाली पंचारियांकडे गटनेतेपदाची सूत्रे! उपनेत्यासह यांचीही केली निवड

संगमनेर, प्रतिनिधी- 
संगमनेरच्या स्थानिक राजकारणातून या क्षणाची सर्वात मोठी बातमी समोर येत आहे. नगराध्यक्षा मैथिलीताई तांबे यांनी 2.0 च्या माध्यमातून आगामी काळातील विकासाचे रणशिंग फुंकले असून, त्यांच्या मार्गदर्शनाखाली संगमनेर नगरपालिकेच्या नव्या कारभाऱ्यांची घोषणा करण्यात आली आहे. अत्यंत महत्त्वपूर्ण आणि अधिकृत प्रक्रियेत नगरसेविका दिपाली पंचारिया यांची संगमनेर नगरपालिका गटनेतेपदी निवड करण्यात आली आहे. 

आमदार सत्यजित तांबे, माजी आमदार डॉ. सुधीर तांबे, माजी मंत्री बाळासाहेब थोरात यांच्या नेतृत्वाखाली संगमनेर नगर परिषदेमध्ये ‘संगमनेर सेवा समिती’ने मोठे यश मिळविले आहे. 30 पैकी तब्बल 27 नगरसेवक सेवा समितीचे निवडून आले आहे. तर महायुतीची केवळ एकमेव महिला विजयी झाले आहे. उर्वरित दोन अपक्ष उमेदवार सेवा समितीचे मानले जातात. या पार्श्वभूमीवर गुरुवारी अहिल्या नगरच्या जिल्हाधिकाऱ्यांसमोर संगमनेर सेवा समितीच्या नगरसेवकांच्या गटाची नोंदणी करण्यात आली.

जिल्हा प्रशासनाच्या साक्षीने पार पडलेल्या या निवडीमध्ये केवळ गटनेतेपदच नव्हे, तर नगरपालिकेच्या सत्तेचा समतोल राखण्यासाठी एका सक्षम फळीची बांधणी करण्यात आली आहे. उपगटनेतेपदाची महत्त्वाची जबाबदारी नगरसेवक सौरभ विवेक कासार यांच्या खांद्यावर सोपवण्यात आली आहे. तर, सेक्रेटरीपदी लाला मुजीब खान आणि खजिनदारपदी भारत बोऱ्हाडे यांची वर्णी लागली आहे. या निवडीमुळे शहराच्या राजकीय वर्तुळात, कार्यकर्त्यांमध्ये कमालीचा उत्साह पाहायला मिळत आहे.

निवासी उपजिल्हाधिकारी दादासाहेब गीते आणि माजी नगराध्यक्षा दुर्गाताई तांबे यांच्या प्रमुख उपस्थितीत झालेल्या या निवडीने संगमनेरच्या सत्तेची नवी समीकरणे आता स्पष्ट झाली आहेत. या नव्या निवडीमुळे संगमनेर शहरात समर्थक कार्यकर्त्यांनी मोठा जल्लोष साजरा केला. 

नव्या टीमच्या माध्यमातून पालिकेच्या कामकाजात आता नवी गती येणार असल्याचे बोलले जात आहे. विशेषतः प्रलंबित प्रश्नांची सोडवणूक आणि शहराच्या सर्वांगीण विकासासाठी ही ‘मैथिलीताई तांबे टीम’ आता अ‍ॅक्शन मोडमध्ये दिसणार आहे.

आपल्या निवडीनंतर नव्या पदाधिकाऱ्यांनी म्हटले आहे की, पक्षाने आणि नेतृत्वाने टाकलेला हा विश्वास सार्थ ठरवण्यासाठी आम्ही कटिबद्ध आहोत. ही निवड केवळ एका पदाची नसून ती संगमनेरच्या जनतेच्या सेवेची नवी संधी आहे. सर्व नगरसेवकांना सोबत घेऊन, संघभावनेने आणि सकारात्मक दृष्टिकोनातून शहराचा चेहरामोहरा बदलण्यासाठी आम्ही अहोरात्र कष्ट घेऊ, असा ठाम निर्धार व्यक्त केला.

या निवडीच्या वेळी संगमनेरचे सर्व नगरसेवक आणि विविध क्षेत्रांतील मान्यवर मोठ्या संख्येने उपस्थित होते. राजकीय विश्लेषकांच्या मते, या नवीन टीमच्या माध्यमातून नगराध्यक्षा मैथिलीताई तांबे यांनी विरोधकांना मोठा शह दिला असून, विकासाच्या मुद्द्यावर आता संगमनेर नगरपालिका अधिक प्रभावीपणे काम करताना दिसेल. सामाजिक, व्यापारी आणि राजकीय स्तरावरून या नूतन पदाधिकाऱ्यांवर सध्या अभिनंदनाचा वर्षाव होत असून, राज्यात सर्वाधिक मतांनी विजयी होणाऱ्या नगराध्यक्षांमध्ये मैथिलीताई तांबे यांचा सर्वात वरचा क्रमांक लागत असल्याने आगामी काळात ही नवी टीम संगमनेरच्या विकासाची कोणती नवी शिखरे सर करते, याकडे संपूर्ण जिल्ह्यासह राज्याचे लक्ष लागले आहे.