रायतेवाडी फाटा ते संगमनेर खुर्द विद्युतीकरण! माजी मंत्री बाळासाहेब थोरातांच्या कामाचे श्रेय घेण्याचा नवीन लोकप्रतिनिधींचा प्रयत्न, संगमनेर खुर्दचे उपसरपंच गणेश शिंदेंनी दिली पुराव्यासह सडेतोड उत्तरं…

संगमनेर, प्रतिनिधी – 

रायतेवाडी फाटा ते संगमनेर खुर्द या रस्त्याच्या चौपदरीकरणासह विद्युतीकरण आणि पादचारी मार्गाचे काम माजी महसूल मंत्री आमदार बाळासाहेब थोरात यांच्या सातत्यपूर्ण पाठपुराव्यातून मंजूर झाले आहे. ७ फेब्रुवारी २०२३ रोजीच या कामासाठी २ कोटी रुपयांच्या निधीला मंजुरी मिळाली असताना, नवीन लोकप्रतिनिधी मात्र खोटी माहिती देऊन जनतेची दिशाभूल करत आहेत, असा घणाघाती आरोप संगमनेर खुर्दचे उपसरपंच गणेश शिंदे यांनी केला आहे.

याबाबत प्रसिद्धीस दिलेल्या पत्रकात गणेश शिंदे यांनी म्हटले आहे की, संगमनेर शहरातील वाहतूक कोंडी सोडवण्यासाठी बाळासाहेब थोरात यांनी ९ किलोमीटरचा बायपास आणि इंजिनिअरिंग कॉलेज ते रायतेवाडी फाटा या ‘हॅपी हायवे’चे काम मंजूर करून घेतले. यातील बस स्थानकापर्यंतचे आणि रायतेवाडी फाटा ते प्रवरा नदीपर्यंतचे चौपदरीकरण पूर्ण झाले आहे. या रस्त्यावर पथदिवे, हाय मॅक्स दिवे आणि पादचारी मार्गासाठी ७ फेब्रुवारी २०२३ रोजी तत्कालीन सार्वजनिक बांधकाम मंत्र्यांकडे पाठपुरावा करून थोरात यांनी निधी मंजूर करून घेतला होता.

विद्युतीकरणाच्या या कामाची निविदा कार्यकारी अभियंता (विद्युत विभाग) यांच्यामार्फत ६ मार्च २०२४ रोजी उघडण्यात आली असून १३ मार्च २०२४ रोजी हे काम संबंधित ठेकेदाराला सोपवण्यात आले आहे. याबाबतचे अधिकृत पत्र ग्रामपंचायतीलाही प्राप्त झाले आहे. संगमनेर खुर्द ग्रामपंचायतीने या कामासाठी थोरात साहेबांकडे आणि सार्वजनिक बांधकाम विभागाकडे रीतसर मागणी केली होती, ही वस्तुस्थिती असल्याचे शिंदे यांनी स्पष्ट केले.

असे असताना केवळ राज्यात आपले सरकार आहे म्हणून माहितीचा विपर्यास करून नवीन लोकप्रतिनिधी या कामाचे श्रेय घेण्याचा प्रयत्न करत आहेत. अद्याप तालुक्यासाठी एक रुपयाचाही नवीन निधी त्यांना आणता आलेला नाही. आयत्या पिठावर रेघोट्या मारण्याचे काम त्यांनी थांबवावे. जनतेने त्यांना यापूर्वीच धडा शिकवला असून, यापुढे अशा प्रकारे दिशाभूल केल्यास त्यांना गावबंदी करण्यात येईल, असा इशाराही गणेश शिंदे व ग्रामस्थांनी दिला आहे.

निधी आणा आणि मग श्रेय घ्या; ग्रामस्थांचा संताप – महायुती सरकारच्या काळात तिजोरीत खडखडाट असून नवीन कामांना निधी मिळत नाही, ही वस्तुस्थिती आहे. सध्या सुरू असलेली सर्व कामे बाळासाहेब थोरात यांनीच मंजूर केलेली आहेत. कोणत्याही कामात योगदान नसताना केवळ पत्रकबाजी करून श्रेय लाटण्याचा प्रयत्न नवीन लोकप्रतिनिधींनी करू नये, अशी संतप्त भावना संगमनेर खुर्दचे सरपंच, उपसरपंच आणि सदस्यांनी व्यक्त केली आहे.