सहज भेट अन् मोठ्या प्रश्नाचे उत्तर; नगरसेवक योगेश जाजूंच्या प्रयत्नाने ड्रेनेजचे काम सुरू!

संगमनेर, प्रतिनिधी – 

राजकारणापलीकडे जाऊन जेव्हा समाजकारण केले जाते, तेव्हा सामान्यांचे प्रश्न कसे मार्गी लागतात, याचा प्रत्यय संगमनेर नगरपरिषदेच्या प्रभाग क्रमांक १४ मध्ये आला आहे. नगरसेवक योगेश (चिकू) जाजू यांच्या तत्परतेमुळे परदेशपुरा आणि जुम्मा मशीद परिसरातील गेल्या अनेक वर्षांपासून प्रलंबित असलेला ड्रेनेजचा प्रश्न निकाली निघाला असून प्रत्यक्ष कामाला सुरुवात झाली आहे.

संगमनेरमधील परदेशपुरा आणि जुम्मा मशीद हा दाट लोकवस्तीचा भाग आहे. या परिसरात गेल्या अनेक वर्षांपासून ड्रेनेजची मोठी समस्या निर्माण झाली होती. सांडपाण्याचा निचरा व्यवस्थित होत नसल्याने परिसरात दुर्गंधी पसरत होती, याचा थेट परिणाम नागरिकांच्या आरोग्यावर होत होता. अनेकदा मागणी करूनही तांत्रिक कारणांमुळे हे काम रखडलेले होते.

३-४ दिवसांपूर्वी नगरसेवक योगेश जाजू हे वैयक्तिक भेटीगाठींसाठी या परिसरात गेले होते. आपल्या हक्काचा लोकप्रतिनिधी जवळ आल्याचे पाहून स्थानिक रहिवासी आणि त्यांच्या मित्रांनी या गंभीर समस्येकडे त्यांचे लक्ष वेधले. प्रश्नाचे गांभीर्य ओळखून जाजू यांनी कोणताही विलंब न लावता त्याच ठिकाणाहून नगरपालिकेच्या संबंधित विभागाच्या कर्मचाऱ्यांशी संपर्क साधला.

केवळ सूचना देऊन न थांबता, योगेश जाजू यांनी कर्मचाऱ्यांना प्रत्यक्ष परिस्थितीची पाहणी करण्यास भाग पाडले आणि कामाचे महत्त्व पटवून दिले. त्यांच्या या सातत्यपूर्ण पाठपुराव्यामुळे आता प्रत्यक्ष कामाला सुरुवात करण्यात आली. ड्रेनेज लाईनचे काम सुरू झाल्याने परिसरातील सांडपाण्याचा प्रश्न आता कायमचा मिटणार आहे.

अनेक वर्षे रखडलेले काम नगरसेवकाच्या एका भेटीमुळे आणि प्रामाणिक प्रयत्नांमुळे मार्गी लागल्याने परदेशपुरा भागातील नागरिकांनी समाधान व्यक्त केले आहे. तत्परता दाखवल्याबद्दल स्थानिक रहिवाशांनी योगेश जाजू आणि नगरपालिका कर्मचाऱ्यांचे आभार मानले आहेत.

📌 लोकांच्या मूलभूत समस्या सोडवणे हे माझे प्रथम कर्तव्य आहे. केवळ एका भेटीत नागरिकांची अडचण समोर आली आणि त्यावर मार्ग काढता आला, याचे मला मनस्वी समाधान आहे. यापुढेही प्रभागाचा सर्वांगीण विकास हेच माझे ध्येय असेल. — योगेश (चिकू) जाजू, नगरसेवक.