संगमनेरात महिलांच्या दागिन्यांवर चोरट्यांचा डल्ला; भाजप आक्रमक, पोलीस निरीक्षकांना दिले निवेदन

संगमनेर, प्रतिनिधी – 

शहरासह परिसरात सध्या चोरट्यांनी उच्छाद मांडला असून महिलांचे मंगळसूत्र ओढण्याचे प्रकार मोठ्या प्रमाणात वाढले आहेत. या वाढत्या गुन्हेगारीच्या विरोधात संगमनेर भारतीय जनता पक्षाच्या वतीने बुधवारी पोलीस निरीक्षकांना निवेदन देण्यात आले.

सध्या सोन्या-चांदीचे भाव गगनाला भिडलेले असतानाच दागिने चोरीच्या घटनांमध्येही वाढ झाली आहे. मकरसंक्रांतीच्या पार्श्वभूमीवर सध्या हिंदू समाजातील महिलांचे हळदी-कुंकवाचे कार्यक्रम सुरू असून वाण खरेदीसाठी बाजारपेठेत मोठी गर्दी होत आहे. याचाच फायदा घेत बस स्टँड, अशोक चौक, बाजारपेठ मेनरोड, नवीन नगर रोड, नाशिक रोड, इंदिरानगर आणि मालदाड रोड यांसारख्या वर्दळीच्या भागात दुचाकीवरून येणारे चोरटे महिलांच्या गळ्यातील दागिने ओरबाडून नेऊ लागले आहेत. या घटनांमुळे महिलांमध्ये भीतीचे वातावरण पसरले आहे.

या गंभीर समस्येकडे लक्ष वेधत, पोलिसांनी अशा घटना रोखण्यासाठी तातडीने कडक पावले उचलावीत, अशी मागणी भाजपने केली आहे. ज्या विशिष्ट भागात चोऱ्यांचे प्रमाण जास्त आहे, त्या ठिकाणी पोलिसांनी गस्त वाढवावी आणि सीसीटीव्ही कॅमेऱ्यांचे योग्य नियोजन करून गुन्हेगारांवर वचक बसवावा. तसेच शहरातील रेकॉर्डवरील (हिस्ट्रीशीटर) गुन्हेगारांना योग्य त्या कलमाखाली ताब्यात घेऊन त्यांची चौकशी करावी, अशा मागण्या या निवेदनात करण्यात आल्या आहेत. महिलांचे सौभाग्य लेणे सुरक्षित राखण्याची जबाबदारी पोलीस प्रशासन योग्य तऱ्हेने पार पाडेल, अशी अपेक्षा यावेळी व्यक्त करण्यात आली.

यावेळी भाजपच्या ज्येष्ठ महिला कार्यकर्त्या कांचनताई ढोरे, रेश्माताई खांडरे, रेखाताई गलांडे आणि उषाताई कपिले यांच्यासह जिल्हा सचिव राजेंद्र सांगळे, सचिन खुळे, मुकुंद उपरे, मनोज जुंदरे, कल्पेश पोगुल, दीपक भगत, संपत गलांडे, रवी उडता, अमित गुप्ता, अविनाश फटांगरे, योगेश सूर्यवंशी, दीपेश ताटकर, पप्पू तेजी, संदीप मोहोळे, अविनाश ओझा, वैभव घुले, दीपक भालेराव, भरत ढोरे, किरण ढोरे, लक्ष्मीकांत हजारे, विकास गुळवे, जग्गु शिंदे, विकास शिंदे आणि अमोल रनाते इत्यादी कार्यकर्ते मोठ्या संख्येने उपस्थित होते.