हॉटेलमध्ये काम करणाऱ्या संगमनेरच्या तरुण कामगाराची गळफास घेऊन आत्महत्या

शिर्डी:

तीर्थक्षेत्र शिर्डी शहरातून एक धक्कादायक घटना समोर आली आहे. येथील एका नामांकित हॉटेलमध्ये काम करणाऱ्या एका तरुण कामगाराने हॉटेलमधील खोलीत गळफास घेऊन आपली जीवनयात्रा संपवली. सोमवारी दुपारच्या सुमारास ही घटना उघडकीस आल्यानंतर हॉटेल परिसरात एकच खळबळ उडाली असून नागरिकांमध्ये भीती आणि हळहळ व्यक्त केली जात आहे.

मिळालेल्या माहितीनुसार, आत्महत्या केलेल्या तरुणाचे नाव विशाल रवींद्र वायकर असून त्याचे वय अंदाजे २२ वर्षे होते. विशाल हा मूळचा संगमनेर तालुक्यातील रहिवासी होता. रोजगाराच्या शोधात तो शिर्डीत आला होता आणि सध्या राहता तालुक्यातील गणेश नगर येथे वास्तव्यास होता. तो गेल्या काही काळापासून शिर्डीतील एका हॉटेलमध्ये कामगार म्हणून सेवा बजावत होता.

सोमवारी दुपारच्या सुमारास हॉटेलमधील एका खोलीचा दरवाजा आतून बंद असल्याचे व्यवस्थापनाच्या लक्षात आले. बराच वेळ उलटूनही आणि वारंवार आवाज देऊनही आतून कोणताही प्रतिसाद न मिळाल्याने हॉटेल कर्मचाऱ्यांची चिंता वाढली. संशय बळावल्याने व्यवस्थापनाने तातडीने शिर्डी पोलिसांना पाचारण केले. माहिती मिळताच शिर्डी पोलीस ठाण्याचे पोलीस उपनिरीक्षक सागर काळे यांच्यासह पोलीस पथक घटनास्थळी दाखल झाले.

पोलिसांनी पंचांच्या उपस्थितीत बंद खोलीचा दरवाजा उघडला असता, विशाल वायकर याचा मृतदेह गळफास घेतलेल्या अवस्थेत आढळून आला. पोलिसांनी तातडीने घटनास्थळाचा सखोल पंचनामा केला आणि मृतदेह ताब्यात घेऊन शवविच्छेदनासाठी ग्रामीण रुग्णालयात रवाना केला. या आत्महत्येमागील नेमके कारण अद्याप स्पष्ट होऊ शकलेले नाही.

घटनास्थळी कोणतीही सुसाईड नोट सापडली नसल्याने पोलीस आता विशालच्या मोबाईलमधील मेसेज, कॉल रेकॉर्ड्स आणि त्याच्या मित्रपरिवाराकडे चौकशी करत आहेत. मानसिक तणावातून त्याने हे टोकाचे पाऊल उचलले असावे का, यादृष्टीनेही तपास सुरू आहे. शिर्डी पोलिसांनी याप्रकरणी अकस्मात मृत्यूची नोंद केली आहे.