संगमनेर शहरात लवकरच साकारणार देखणी पोलीस वसाहत; आमदार सत्यजीत तांबे यांनी घेतली पोलीस हाऊसिंग बोर्डाच्या महासंचालकांची भेट

मुंबई, प्रतिनिधी – 
राज्याचे मुख्यमंत्री तथा गृहमंत्री देवेंद्र फडणवीस यांच्या सहकार्याने या वसाहतीच्या निर्मितीला अधिकृत मंजुरी मिळाली आहे. या प्रकल्पाच्या नियोजनासंदर्भात आमदार तांबे यांनी मंगळवारी (३ फेब्रुवारी) महाराष्ट्र राज्य पोलीस हाऊसिंग बोर्डाच्या महासंचालक अर्चना त्यागी (IPS) यांची मुंबईत भेट घेऊन सविस्तर चर्चा केली.
यामुळे संगमनेर शहरातील पोलीस कर्मचाऱ्यांच्या निवासस्थानाचा प्रश्न आता मार्गी लागला असून, शहरात आधुनिक आणि सुसज्ज पोलीस वसाहतीची निर्मिती होणार आहे. आमदार सत्यजीत तांबे यांच्या सातत्यपूर्ण पाठपुराव्याला यश आले असून, या भेटीदरम्यान त्यांनी पोलीस वसाहतीच्या कामाला गती देण्याबाबत आग्रही मागणी केली.
संगमनेरमध्ये कर्तव्यावर असलेल्या पोलीस अधिकारी आणि कर्मचाऱ्यांच्या कुटुंबांना उत्तम दर्जाची निवासस्थाने मिळावीत, यासाठी या वसाहतीचा आराखडा अत्यंत आधुनिक पद्धतीने तयार करण्याच्या सूचना त्यांनी दिल्या. जास्तीत जास्त पोलीस कुटुंबांना या ठिकाणी हक्काची घरे उपलब्ध होतील आणि ही इमारत केवळ सोयीसुविधांनी युक्त न राहता संगमनेर शहराच्या वैभवात भर टाकणारी ठरेल, अशा पद्धतीचे नियोजन करण्यावर या बैठकीत भर देण्यात आला.
मुख्यमंत्री देवेंद्र फडणवीस यांनी या प्रकल्पासाठी मोलाचे सहकार्य केल्याबद्दल आमदार तांबे यांनी त्यांचे आभार मानले आहेत. पोलीस दलातील कर्मचारी रात्रंदिवस नागरिकांच्या सुरक्षेसाठी तैनात असतात, त्यामुळे त्यांना आणि त्यांच्या कुटुंबाला चांगल्या वातावरणात राहता यावे ही आपली प्राथमिकता आहे. या वसाहतीचे बांधकाम लवकरात लवकर सुरू होणार असून, यामुळे संगमनेरमधील प्रशासकीय पायाभूत सुविधांना मोठी बळकटी मिळणार असल्याचे तांबे यांनी यावेळी नमूद केले.