संगमनेर, प्रतिनिधी –
शहराच्या मध्यवस्तीत आणि उच्चभ्रू नागरिकांची वसाहत म्हणून ओळखल्या जाणाऱ्या कुंथूनाथ हौसिंग सोसायटी परिसरात बुधवारी (दि. १८) पहाटेच्या सुमारास एक बिबट्या आढळून आल्याने मोठी खळबळ उडाली आहे. साधारण एक वर्ष वयाचा हा बिबट्याचा बछडा रस्ता चुकल्याने या परिसरात शिरला असावा, असा अंदाज वर्तवण्यात येत आहे. काही नागरिकांनी या बछड्याला प्रत्यक्ष पाहिल्यामुळे परिसरात भीतीचे वातावरण निर्माण झाले असून, घटनेची माहिती मिळताच वन विभागाने तातडीने शोधमोहीम हाती घेतली आहे.
वनक्षेत्रपाल सागर केदार आपल्या सहकाऱ्यांसह आणि रेस्क्यू टीमसह घटनास्थळी दाखल झाले असून, त्यांनी दिवसभर या परिसरात तळ ठोकून बिबट्याचा शोध घेतला. दरम्यान, परिसरातील सीसीटीव्ही कॅमेऱ्यांमध्ये बिबट्याच्या हालचाली स्पष्टपणे कैद झाल्या असून, त्यात तो मुक्तपणे वावरताना दिसत आहे. वन विभागाच्या पथकाने दुपारपर्यंत सखोल शोध घेऊनही बछडा अद्याप मिळून आलेला नाही.
या घटनेमुळे संपूर्ण सोसायटीत दहशतीचे वातावरण असून वनक्षेत्रपाल सागर केदार यांनी नागरिकांना सतर्क राहण्याचे आवाहन केले आहे. बिबट्या चुकून शहरात आला असून त्याचा शोध घेण्यासाठी वन विभागाची रेस्क्यू टीम सज्ज असल्याचे त्यांनी सांगितले. विशेषतः रात्रीच्या वेळी घराबाहेर पडताना नागरिकांनी काळजी घ्यावी आणि लहान मुलांना एकटे सोडू नये, अशा सूचनाही वन विभागाच्या वतीने देण्यात आल्या आहेत.
