संगमनेर, प्रतिनिधी –
राष्ट्रीय स्वयंसेवक संघाच्या शताब्दी वर्षानिमित्त निर्मित ‘शतक’ या चित्रपटाला देशभरात मोठा प्रतिसाद मिळत असताना, संगमनेरमधील मालपाणी मल्टीप्लेक्समध्ये अद्याप हा चित्रपट प्रदर्शित न झाल्याने राजकीय वातावरण तापले आहे. या पार्श्वभूमीवर शिवसेना-भाजपा महायुतीच्या वतीने चित्रपटगृह व्यवस्थापकांना निवेदन देऊन तातडीने शो सुरू करण्याची मागणी करण्यात आली असून, अन्यथा तीव्र आंदोलनाचा इशारा देण्यात आला आहे.
आमदार अमोल खताळ यांच्या मार्गदर्शनाखाली महायुती आणि युवा सेनेच्या पदाधिकाऱ्यांनी मालपाणी मल्टीप्लेक्सच्या व्यवस्थापकांची भेट घेतली. राष्ट्रीय स्वयंसेवक संघाच्या प्रदीर्घ समाजकार्याचा इतिहास आणि राष्ट्रनिर्मितीतील योगदान सर्वसामान्य जनतेपर्यंत पोहोचावे, हा ‘शतक’ चित्रपटाचा मुख्य उद्देश असल्याचे पदाधिकाऱ्यांनी यावेळी नमूद केले. स्थानिक प्रेक्षकांमध्ये या चित्रपटाबाबत मोठी उत्सुकता असूनही तो प्रदर्शित न करणे ही खेदजनक बाब असल्याची भावना महायुतीने व्यक्त केली आहे.
याप्रसंगी शिवसेना शहर प्रमुख विनोद सूर्यवंशी, भाजप तालुका सरचिटणीस महेश मांडेकर, शहर सरचिटणीस भारत गवळी आणि शिवसेना महिला आघाडी उपजिल्हाप्रमुख दिपाली वाव्हळ यांनी व्यवस्थापनाकडे आपली नाराजी व्यक्त केली. चित्रपटाचे नियमित शो त्वरित सुरू न झाल्यास महायुती स्टाईलने आंदोलन छेडले जाईल, असा स्पष्ट इशारा यावेळी देण्यात आला.
निवेदन देताना शिवसेना उपतालुका प्रमुख रणजीत जाधव, पूजा अरगडे, रणजीत गायकवाड, वरद बागुल, युवा सेना उपजिल्हाप्रमुख सौरभ देशमुख, तालुकाप्रमुख सुशील शेवाळे, शहरप्रमुख सार्थक शेवाळे, युवती शहरप्रमुख शिवाज्ञा अरगडे, अविनाश फटांगरे, प्रणव सातपुते, राहुल पखळे आणि सुनील चांडे यांच्यासह महायुतीचे अनेक पदाधिकारी व कार्यकर्ते मोठ्या संख्येने उपस्थित होते. आता चित्रपटगृह प्रशासन यावर काय सकारात्मक निर्णय घेणार, याकडे सर्वांचे लक्ष लागले आहे.
