मुंबई:
राष्ट्रवादी काँग्रेस पक्षाच्या संघटनात्मक रचनेत ऐतिहासिक फेरबदल करण्यात आले असून, राज्याच्या उपमुख्यमंत्री असलेल्या सुनेत्रा पवार यांच्याकडे आता पक्षाच्या राष्ट्रीय अध्यक्षपदाची धुरा सोपवण्यात आली आहे.
अजित पवार यांच्या निधनानंतर रिक्त झालेल्या या पदासाठी सुनेत्रा पवार यांची निवड होणे निश्चित मानले जात होते. वरळी डोम येथील सभागृहात पार पडलेल्या पक्षाच्या राष्ट्रीय कार्यकारिणीच्या बैठकीत ही महत्त्वपूर्ण घोषणा करण्यात आली.
राष्ट्रीय कार्यकारी अध्यक्ष प्रफुल पटेल यांनी सुनेत्रा पवार यांच्या नावाचा प्रस्ताव मांडला, ज्याला उपस्थित सर्व सदस्यांनी एकमताने आणि हात उंचावून पाठिंबा दर्शवला.
या निवडीनंतर प्रफुल पटेल यांनी अजित पवार यांच्या नेतृत्वाचा गौरव करताना त्यांना एका खऱ्या सेनापतीची उपमा दिली. २०२४ च्या विधानसभा निवडणुकीत राष्ट्रवादी काँग्रेसला मिळालेल्या यशात अजित पवारांचे योगदान अमूल्य असल्याचे त्यांनी नमूद केले.
मध्यंतरी या पदासाठी प्रफुल पटेल यांच्या नावाची चर्चा होती, मात्र कायदेशीर प्रक्रिया पूर्ण करूनच सुनेत्रा पवार यांची निवड करण्यात आली आहे. आता आगामी काळात सर्व नेतेमंडळी सुनेत्रा पवार यांच्या नेतृत्वाखाली पक्ष संघटना अधिक बळकट करण्यासाठी प्रयत्न करणार असल्याचे स्पष्ट करण्यात आले आहे.
प्रदेशाध्यक्ष सुनील तटकरे यांनी देखील यावेळी आपल्या भावना व्यक्त केल्या. अजित पवारांच्या अनुपस्थितीत हे राष्ट्रीय अधिवेशन पार पाडण्याची वेळ येणे हे दुर्दैवी असल्याचे सांगत त्यांनी अजित पवारांच्या राजकीय प्रवासाचा आढावा घेतला. विशेषतः २०२४ च्या निवडणुकीत पक्षाला सर्वात मोठा पक्ष बनवण्यात अजित पवारांचे मोठे योगदान होते, असे त्यांनी आवर्जून सांगितले. सुनेत्रा पवार आता राज्याच्या उपमुख्यमंत्रिपदासह पक्षाच्या राष्ट्रीय अध्यक्षपदाची जबाबदारी कशा प्रकारे हाताळतात, याकडे सर्वांचे लक्ष लागले आहे.
