तुकाराम मुंडेंचा आदेश अन् अहिल्यानगरमध्ये धडक कारवाई! नामांकित ब्रँड्सचे लाखो रुपयांचे अन्नपदार्थ जप्त

महाराष्ट्र संवाद न्यूज ऑनलाईन, अहिल्यानगर:

अहिल्यानगर जिल्ह्यात प्रशासनाकडून अन्न भेसळविरोधी विशेष मोहीम तीव्र करण्यात आली असून, या अंतर्गत राहुरी आणि नेवासा तालुक्यात मोठी कारवाई करण्यात आली आहे. या कारवाईत एकूण २ लाख ८४ हजार १८० रुपये किमतीचे संशयित आईस्क्रीम आणि खाद्यतेल जप्त करण्यात आल्याची माहिती अन्न विभागाचे सहायक आयुक्त अ. अ. भोईटे यांनी दिली आहे.

या मोहिमेदरम्यान राहुरी येथील ‘शिवशक्ती आईस्क्रीम’ या दुकानाची तपासणी करण्यात आली. तेथून ‘शिवशक्ती’ ब्रँडच्या गुलकंद आणि अमेरिकन नट्स आईस्क्रीमचे नमुने प्रयोगशाळेत विश्लेषणासाठी पाठवण्यात आले आहेत. हे आईस्क्रीम दर्जाहीन असल्याच्या संशयावरून प्रशासनाने ४१ हजार ४४० रुपये किमतीचे एकूण १४८ पॅकेट्स जप्त केले आहेत.

दुसऱ्या कारवाईत नेवासा तालुक्यातील कडू गल्ली येथील ‘संतोष किराणा स्टोअर्स’वर छापा टाकण्यात आला. तिथे ‘एसबीजी’ ब्रँडच्या रिफाइंड पामोलीन खाद्यतेलाचा नमुना तपासणीसाठी घेण्यात आला. हा साठा संशयास्पद वाटल्याने अधिकाऱ्यांनी २ लाख ४२ हजार ७४० रुपये किमतीचे १ हजार ४९८.४ किलो खाद्यतेल जप्त केले आहे.

अन्न व औषध विभागाचे आयुक्त तुकाराम मुंडे यांच्या आदेशानुसार आणि सहआयुक्त श्रीकांत करकाळे यांच्या मार्गदर्शनाखाली अन्न सुरक्षा मानके कायदा २००६ व नियम २०११ अंतर्गत ही विशेष मोहीम राबवली जात आहे. या कारवाईत अन्न सुरक्षा अधिकारी प्रदीप पवार, उ. र. पाटील आणि सहायक आयुक्त अ. अ. भोईटे यांनी थेट सहभाग घेतला. नागरिकांना अन्नपदार्थांच्या गुणवत्तेबाबत काहीही शंका असल्यास त्यांनी प्रशासनाशी संपर्क साधावा, असे आवाहनही करण्यात आले आहे.