विधान परिषद निवडणूक : १७ पैकी ५ जागांवर उमेदवार बिनविरोध, वाचा कोणाचा आहे समावेश

मुंबई : विशेष प्रतिनिधी

राज्यातील विधान परिषद निवडणुकीत अर्ज मागे घेण्याच्या अंतिम दिवशी मोठ्या राजकीय घडामोडी घडल्या असून १७ पैकी ५ जागांवर उमेदवार बिनविरोध निवडून आले आहेत. विविध मतदारसंघांत उमेदवारांनी माघार घेतल्याने काही ठिकाणी निवडणूक केवळ औपचारिकता राहिली आहे.

पुणे शिक्षक मतदारसंघातून महायुतीचे विक्रम काकडे बिनविरोध निवडून येण्याचा मार्ग मोकळा झाला. राष्ट्रवादी काँग्रेस (शरद पवार गट) समर्थित उमेदवार श्रीकांत पाटील यांनी माघार घेतल्यानंतर ही स्थिती निर्माण झाली.

रायगड-रत्नागिरी-सिंधुदुर्ग मतदारसंघात महायुतीचे अनिकेत तटकरे बिनविरोध निवडून आले आहेत. मविआचे उमेदवार बाळ माने यांनी अर्ज मागे घेतल्याने तटकरे यांच्या विजयाचा मार्ग सुकर झाला.

यवतमाळ स्थानिक स्वराज्य संस्था मतदारसंघात दुश्यंत चतुर्वेदी यांची बिनविरोध निवड निश्चित झाली. प्रतिस्पर्धी उमेदवारांनी माघार घेतल्याने त्यांचा विजय निश्चित मानला जात आहे.

वर्धा-चंद्रपूर-गडचिरोली मतदारसंघातून भाजपचे अरुण लखानी बिनविरोध विजयी झाले. काँग्रेसचे शैलेश कुमार अग्रवाल तसेच अपक्ष उमेदवार सुधीर कोठारी यांनी उमेदवारी मागे घेतल्याने ही परिस्थिती निर्माण झाली.

ठाण्यातून महाविकास आघाडीचे उमेदवार अभिजित पवार यांनी अर्ज मागे घेतल्यानंतर शिंदे सेनेचे रवींद्र फाटक यांचीदेखील बिनविरोध निवड निश्चित झाली आहे.

अर्ज माघारीच्या अंतिम टप्प्यात झालेल्या या घडामोडींमुळे विधान परिषद निवडणुकीच्या राजकीय समीकरणांमध्ये मोठे बदल झाले असून उर्वरित जागांवरील लढतीकडे आता सर्वांचे लक्ष लागले आहे.