संगमनेर नगरपरिषदेचा दणका: भाजप नेत्याच्या मुलाविरुद्ध अनधिकृत बांधकाम प्रकरणी गुन्हा दाखल करण्याचे पोलिसांना आदेश

महाराष्ट्र संवाद न्यूज ऑनलाईन | संगमनेर:

संगमनेर शहरात अनधिकृत बांधकामाचा प्रश्न चांगलाच तापला असून, यामध्ये राजकीय वरदहस्त असलेल्या व्यक्तीवर नगरपरिषदेने अखेर कायदेशीर बडगा उगारला आहे. संगमनेरमधील भारतीय जनता पक्षाच्या एका बड्या नेत्याच्या मुलाविरुद्ध विनापरवाना व बेकायदेशीर इमारत बांधकाम केल्याप्रकरणी आणि पालिकेच्या नोटिसांना केराची टोपली दाखवल्यामुळे गुन्हा दाखल करण्याचे थेट आदेश संगमनेर नगरपरिषदेचे मुख्याधिकारी दयानंद गोरे यांनी शहर पोलिसांना दिले आहेत. या धडक कारवाईमुळे शहरातील भूमाफिया आणि बेकायदेशीर बांधकाम करणाऱ्यांचे धाबे दणाणले आहेत.

मिळालेल्या माहितीनुसार, अनिकेत अशोक इथापे यांनी संगमनेर येथील सुकेवाडी रोड परिसरातील सर्व्हे नंबर १५३/१/१ मधील अंदाजे ६५० चौरस मीटर क्षेत्रफळ असलेल्या भूखंडावर नगरपरिषदेची कोणतीही पूर्वपरवानगी न घेता थेट ‘जी प्लस ४’ (तळमजला अधिक चार मजले) अशा टोलेजंग इमारतीचे अनधिकृत बांधकाम सुरू केले होते.

या बेकायदेशीर बांधकामाबाबत महाराष्ट्र प्रादेशिक व नगररचना अधिनियम १९६६ चे कलम ५४ अन्वये नगरपरिषदेमार्फत यापूर्वी दि. १७/१२/२०२४ आणि त्यानंतर दि. ३०/०३/२०२६ रोजी अशा दोन वेळा रीतसर नोटिसा बजावण्यात आल्या होत्या. या नोटिसांद्वारे हे अनधिकृत बांधकाम त्वरित थांबवण्याचे आणि केलेले बांधकाम स्वतःहून काढून घेण्याचे आदेश देण्यात आले होते. मात्र, संबंधिताने या दोन्ही कायदेशीर नोटिसांना पूर्णपणे केराची टोपली दाखवली आणि आपले बेकायदेशीर बांधकाम सुरूच ठेवले.

या दरम्यान, स्थानिक नागरिकांनी या धोकादायक आणि अनधिकृत बांधकामाविरोधात नगरपरिषदेकडे तीव्र तक्रारी केल्या होत्या. नागरिकांच्या तक्रारींची दखल घेऊन दि. ०५/०६/२०२६ रोजी स्थानिक पालिका प्रशासनाने प्रत्यक्ष जागेवर जाऊन पाहणी केली. या पाहणीत धक्कादायक वास्तव समोर आले. नोटिसा मिळालेल्या असतानाही संबंधित जागेवर पाचव्या मजल्यावर ब्लॉक बसवण्याचे काम सर्रास सुरू होते. अत्यंत निष्काळजीपणे सुरू असलेल्या या बांधकामाचे सिमेंट ब्लॉक शेजारीच राहणारे अयुब मणियार यांच्या इमारतीवर, अंगणात तसेच पश्चिम बाजूच्या सार्वजनिक रस्त्यावर पडल्याचे आढळून आले. या बेजबाबदार कृत्यामुळे स्थानिक नागरिकांच्या जीवितास गंभीर धोका निर्माण झाला असून, कोणत्याही क्षणी मोठी दुर्घटना घडण्याची भीती निर्माण झाली आहे.

अखेर या गंभीर प्रकरणाची दखल घेत मुख्याधिकारी दयानंद गोरे यांनी संगमनेर शहर पोलीस स्टेशनचे पोलीस निरीक्षक यांना लेखी आदेश जारी केले आहेत. आरोपीने ‘एमआरटीपी’ कायद्याच्या कलम ५२ आणि ५४ च्या तरतुदींचे सरळ-सरळ उल्लंघन केले असून हा गुन्हा दखलपात्र स्वरूपाचा आहे, त्यामुळे संबंधितावर तात्काळ कायदेशीर गुन्हा दाखल करावा, अशी स्पष्ट मागणी पालिकेने केली आहे. तसेच या प्रकरणात कायदेशीर कारवाईसाठी रचना सहाय्यक श्रीमती वैष्णवी गडाख आणि सहायक नगररचनाकार (प्रभारी) ओंकार सहाणे यांना मुख्याधिकाऱ्यांच्या वतीने प्राधिकृत करण्यात आले आहे.

पालिका प्रशासनाची नजर आता शहरातील पक्क्या बांधकामांकडे वळल्याने या रोखठोक कारवाईमुळे आता पोलीस प्रशासन संबंधित भाजप नेत्याच्या मुलाविरुद्ध कधी आणि काय कारवाई करते, याकडे संपूर्ण संगमनेर शहराचे लक्ष लागले आहे.