अयोध्येतील राम मंदिरातील देणगी चोरीचं प्रकरण ताजं असताना, त्याबद्दल रामभक्तांमध्ये संताप असताना आता श्रीरामाच्या नावानं झालेला एक गंभीर घोटाळा समोर आला आहे. बीएड आणि शिक्षक प्रशिक्षण कॉलेजांचं कागदांवरील साम्राज्य उघडकीस आलं आहे. भाजपची सत्ता असलेल्या राज्यांमध्ये अनेक कॉलेज शेतांमध्ये, ओसाड जागांवर नोंदणीकृत आहेत. तिथे गेल्यावर दिसणारी परिस्थिती वेगळीच आहे.
काही कॉलेज लहान शाळांच्या परिसरांमध्ये भरत आहेत. काही ठिकाणी तर एकाच पत्त्यावर तीन-तीन संस्थांना मान्यता देण्यात आलेली आहे. प्रत्यक्ष पडताळणीत अनेक त्रुटी आणि गायब पत्ते सापडल्यानंतरही बरकतउल्ला विद्यापीठाने केवळ एका नोटरी शपथपत्राच्या आधारावर १२५ खासगी बीएड कॉलेजांच्या प्रवेश प्रक्रियेला हिरवा झेंडा दाखवला आहे. या सगळ्यामुळे विद्यार्थ्यांच्या भविष्याला धोका निर्माण झाला आहे.
राजधानी भोपाळमधील विदिशा रोडवर श्रीराम कॉलेज आहे. भूखंड क्रमांक १४८/१४९/२/१ वर श्रीराम कॉलेजची नोंद आहे. या कॉलेजमधून दरवर्षी १५० विद्यार्थी (१०० बीएड आणि ५० बीएससी बीएड) शिकून बाहेर पडतात. पण या कॉलेजच्या पत्त्यावर श्रीराम कॉलेज नावाची कोणतीही संस्था दिसत नाही. या परिसरात तीन भवन आहेत. त्यातील एक बंद होतं. दुसऱ्यावर मिलेनियम ग्रुपचा फलक होता. तर तिसऱ्याचं काम सुरू आहे. त्याच्या बाहेर बगलामुखी कॉलेजचा फलक लावण्यात आलेला होता.
श्रीराम कॉलेजच्या नावावर नोंद असलेल्या भूखंड क्रमांक १४८ वर केवळ एक रिकामं शेत आहे. तिथे शेती होते. पण तिथे कोणतंही कॉलेज, वर्ग, प्रयोगशाळा, ग्रंथालय नाही. पण कागदांवर दरवर्षी प्रवेश होतात, परीक्षा घेतल्या जातात आणि पदव्याही वाटल्या जातात. हा सगळा प्रकार गेल्या १० वर्षांपासून सुरू आहे. कागदावर असलेल्या कॉलेजांचा सिलसिला केवळ श्रीराम कॉलेजपुरता मर्यादित नाही. भोपाळच्याच बावडिया कलामध्ये सेव्हियर कॉलेज एका लहानशा शाळेच्या परिसरात चालतं. याच ठिकाणी एका सोसायटीचं कार्यालयदेखील आहे. या ठिकाणी विद्यार्थी येतात. पण नियमित येत नाहीत, अशी कबुली कॉलेजच्या प्राचार्या डॉ. प्रिती श्रीवास्तव यांनी दिली. भोपाळच्याच साकेत नगरात कागदावर असलेल्या ‘कमलनाथ बीपीएड कॉलेज’च्या पत्त्यावर एका खोलीत केवळ शिक्षिका बसलेली होती. कॉलेज दुसरीकडेच सुरू असल्याचं त्यांनी सांगितलं.
