माजी मंत्री बाळासाहेब थोरात यांच्या मध्यस्थीने संगमनेरात शेतकऱ्यांचा दीड तासांचा महामार्ग रोको मागे शासकीय बफर स्टॉकमधून युरिया मिळताच आंदोलन स्थगनावर शिक्कामोर्तब; लिंकिंग आणि ढिसाळ नियोजनावरून महायुती सरकारवर कडाडून टीका

महाराष्ट्र संवाद न्यूज ऑनलाईन
संगमनेर :
खरीप हंगामाच्या ऐन गर्दीत सातत्याने मागणी करूनही युरिया खत उपलब्ध होत नसल्याने संतप्त झालेल्या संगमनेर तालुक्यातील शेतकऱ्यांनी नाशिक-पुणे महामार्गावर सुमारे दीड तास आक्रमक रास्ता रोको आंदोलन केले. महायुती सरकारच्या शेतकरी विरोधी धोरणांचा तीव्र निषेध नोंदवत शेतकऱ्यांनी संपूर्ण वाहतूक रोखून धरली होती. आंदोलनाची वाढती तीव्रता लक्षात घेऊन प्रशासन व काही शेतकऱ्यांनी माजी कृषिमंत्री बाळासाहेब थोरात यांना मध्यस्थीची विनंती केली. थोरात यांनी तातडीने कृषी विभागाला शासकीय बफर स्टॉकमधील युरिया मोकळा करण्याच्या सूचना दिल्या आणि प्रशासनाने ती मागणी मान्य करताच शेतकऱ्यांनी आपले आंदोलन मागे घेतले.
नाशिक-पुणे महामार्गावर मंगळवारी सकाळपासूनच शेतकरी बांधव आणि महिला युरियासाठी पहाटे पाच वाजेपासून रांगेत उभे होते. मात्र, खतांचा तुटवडा आणि अपुरा पुरवठा यामुळे शेतकऱ्यांचा संयम सुटला आणि महामार्गावर भव्य रास्ता रोको सुरू झाला. यावेळी आंदोलकांनी सरकारच्या चुकीच्या धोरणांविरोधात जोरदार घोषणाबाजी केली.
घटनेचे गांभीर्य ओळखून उपविभागीय कृषी अधिकारी अक्षय गोसावी, पोलीस निरीक्षक समीर बारवकर, पोलीस उपनिरीक्षक विकास ढोकरे यांच्यासह कृषी आणि पोलीस प्रशासनाचे वरिष्ठ अधिकारी मोठ्या संख्येने घटनास्थळी दाखल झाले होते.
या प्रसंगी आंदोलनकर्त्यांना संबोधित करताना माजी मंत्री बाळासाहेब थोरात म्हणाले की, खरीप हंगामात पिकांना वेळेवर खत मिळणे ही सरकारची प्राथमिक जबाबदारी आहे. शासनाकडे युरियाचा बफर स्टॉक उपलब्ध असतानाही तो शेतकऱ्यांना वितरीत करण्यासाठी परवानगी दिली जात नाही, हे अत्यंत खेदजनक आहे. सध्या खतांचा काळाबाजार सुरू असून, भाववाढ आणि वाटपातील नियोजनाच्या अभावामुळे राज्य सरकारचा कारभार पूर्णपणे ढिसाळ आणि गोंधळाचा झाला आहे. आपल्या प्रदीर्घ कार्यकाळात राज्याचा कृषिमंत्री म्हणून काम करताना अशी भीषण आणि अव्यवस्थित परिस्थिती कधीही पाहिली नव्हती, असा टोलाही त्यांनी लगावला.
बाळासाहेब थोरात यांनी खासगी कंपन्या आणि विक्रेत्यांकडून चालणाऱ्या ‘खत लिंकिंग’च्या प्रकारावर तीव्र संताप व्यक्त केला. शेतकऱ्यांना नडवून त्यांच्या मानगुटीवर नको असलेली खते बळजबरीने लादली जात आहेत आणि हे धाडस वरिष्ठांच्या आशीर्वादाशिवाय शक्य नाही, असा थेट आरोप त्यांनी केला. एकीकडे शेतमालाला योग्य भाव मिळत नाही आणि दुसरीकडे काळाबाजारातून खते विकली जात असताना प्रशासनाचे त्यावर कोणतेही नियंत्रण उरलेले नाही. त्यामुळे प्रशासनाने ताब्यात असलेला बफर स्टॉक तातडीने रिलीज करावा, असा इशारा थोरात यांनी दिला.
प्रशासनाने थोरात यांच्या सूचनेनुसार बफर स्टॉकमधील युरिया वाटप करण्याचे मान्य केल्यानंतर शेतकऱ्यांनी समाधानी होऊन आंदोलन मागे घेतले. या निर्णयानंतर उपस्थित शेतकरी बांधवांनी ‘बाळासाहेब थोरात जिंदाबाद’ आणि ‘शेतकऱ्यांची जाण असणारे नेतृत्व’ अशा घोषणा देत परिसर दुमदुमून टाकला.
बफर स्टॉक वाटपाचे अधिकार शेतकी संघाकडे देण्याची मागणी –
खासगी केंद्रचालकांकडून खतांचे लिंकिंग, वशिलेबाजी आणि गैरप्रकार होत असल्याने शासकीय बफर स्टॉकमधील युरिया वाटपाचे सर्व अधिकार संगमनेर तालुका शेतकी संघाकडेच द्यावेत, अशी एकमुखी मागणी सर्व शेतकऱ्यांनी टाळ्यांच्या गजरात केली. संगमनेर शेतकी संघ अत्यंत पारदर्शकपणे काम करत असल्याने सर्व शेतकऱ्यांना न्याय्य आणि योग्य पद्धतीने खताचा पुरवठा होईल, असा विश्वास व्यक्त करत प्रशासनाने या मागण्यांवर सकारात्मक पावले उचलण्याचे आश्वासन दिल्यानंतर आंदोलनाची पूर्ण सांगता झाली.