संघटित गुन्हेगारीविरोधात मोठे पाऊल; गोवंश तस्करीप्रकरणी ‘बीएनएस’ कलम १११ अन्वये दोघांवर पहिली मोठी कारवाई संगमनेरात

महाराष्ट्र संवाद न्यूज ऑनलाईन
संगमनेर:
संगमनेर शहरात अवैध गोवंश तस्करी आणि कत्तलीच्या माध्यमातून संघटित गुन्हेगारी करणाऱ्या टोळीविरुद्ध पोलिसांनी अत्यंत कठोर कायदेशीर भूमिका घेतली आहे. शहर पोलीस ठाण्यात दाखल असलेल्या प्रकरणातील आरोपींवर आता अपर पोलीस अधीक्षक सोमनाथ वाघचौरे यांच्या आदेशावरून नवीन भारतीय न्याय संहिता २०२३ मधील कलम १११ (संघटित गुन्हेगारी) हे अतिरिक्त वाढीव कलम लावून कारवाई करण्यात आली आहे.
मिळालेल्या माहितीनुसार, १३ जुलै २०२६ रोजी रात्री संगमनेर-पुणे रस्त्यावर देवीगल्लीच्या पाठीमागे विरुद्ध दिशेने जाणाऱ्या एका पांढऱ्या रंगाच्या ‘छोटा हत्ती’ (MH 14 CD 0839) वाहनाची तपासणी करण्यात आली होती. त्यात सुमारे तीन लाख रुपये किमतीचे ५०० किलो गोवंश जातीच्या जनावराचे मांस आढळून आले होते. पोलिसांनी या कारवाईत वाहन व मुद्देमाल जप्त केला होता. या प्रकरणात सलीम रियाज कुरेशी व अतिक उर्फ सोनु रफिक कुरेशी (दोघे रा. मोगलपुरा, संगमनेर) या आरोपींचा सहभाग निष्पन्न झाला होता. या दोन्ही आरोपींचा यापूर्वीचा गुन्हेगारी अभिलेख तपासला असता, त्यांच्यावर प्राणि संरक्षण कायदा व इतर गंभीर स्वरूपाचे अनेक गुन्हे आधीपासूनच दाखल असल्याचे समोर आले.
केवळ आर्थिक फायद्यासाठी संघटित टोळी बनवून गोवंश जनावरांची अवैध वाहतूक, कत्तल, आणि गोमांस विक्रीचा बेकायदेशीर व्यवसाय हे आरोपी सातत्याने करत असल्याचे दिसून आले. या संघटित गुन्हेगारी स्वरूपाच्या कृत्याची गंभीर दखल घेत उपविभागीय पोलीस अधिकारी संगमनेर यांच्यामार्फत अतिरिक्त पोलीस अधीक्षक सोमनाथ वाघचौरे यांच्याकडे प्रस्ताव पाठवण्यात आला होता. या प्रस्तावाचे अवलोकन करून वाघचौरे यांनी या गुन्ह्यात बीएनएस कलम १११ हे अतिरिक्त कलम वाढवण्यास मंजुरी दिली. नवीन कायदेप्रणालीनुसार कलम १११ हे संघटित गुन्हेगारी रोखण्यासाठी अत्यंत कडक शिक्षेची तरतूद असणारे महत्त्वाचे कलम मानले जाते.

आरोपी सलीम रियाज कुरेशी व अतिक उर्फ सोनु रफिक कुरेशी यांच्याबाबत नागरिकांना काही माहिती मिळाल्यास त्यांनी तात्काळ पोलिसांशी संपर्क साधावा, असे आवाहन प्रशासनाने केले आहे.
ही कारवाई अहिल्यानगरचे पोलीस अधीक्षक एम. सुदर्शन, अप्पर पोलीस अधीक्षक सोमनाथ वाघचौरे, उपविभागीय पोलीस अधिकारी कुणाल सोनवणे यांच्या मार्गदर्शनाखाली पोलीस निरीक्षक समीर बारवकर आणि सहाय्यक पोलीस निरीक्षक सचिन वाकडे व त्यांच्या पथकाने पार पाडली आहे.