जवळेकडलगच्या दुर्देवी घटनेनंतर माजी मंत्री बाळासाहेब थोरात यांची पवार कुटुंबाला सांत्वन भेट; बिबट्यांच्या दहशतीवर प्रशासनाने ठोस उपाययोजना करण्याची मागणी

Annant Ppangarkar

महाराष्ट्र संवाद न्यूज ऑनलाईन:

जवळेकडलग येथील अकरा वर्षीय बालक कृष्णा वसंत पवार याचा बिबट्याच्या भीतीने शेततळ्यात पडून झालेला मृत्यू अत्यंत दुर्दैवी आणि वेदनादायी आहे. सध्या ग्रामीण भागात बिबट्यांचे वाढते हल्ले व दहशत अत्यंत चिंताजनक असून, यावर वनविभाग आणि प्रशासनाने तातडीने व कायमस्वरूपी ठोस उपाययोजना कराव्यात, अशी मागणी राज्याचे माजी मंत्री बाळासाहेब थोरात यांनी केली आहे.

जळगाव, धुळे, पुणे आणि नाशिक दौऱ्यावरून परतल्यानंतर आमदार थोरात यांनी तातडीने जवळेकडलग येथे जाऊन वसंत पवार यांच्या निवासस्थानी भेट दिली. त्यांनी पवार कुटुंबीयांचे सांत्वन करत घरातील सदस्यांची आपुलकीने चौकशी केली व संपूर्ण कुटुंबाला धीर दिला. कृष्णाच्या अपघाती निधनाची माहिती मिळताच थोरात यांनी सोशल मीडियावरून शोक व्यक्त केला होता आणि स्थानिक कार्यकर्त्यांना व यंत्रणेला पवार कुटुंबाच्या मदतीसाठी तातडीने पोहोचण्याच्या सूचना दिल्या होत्या.

यावेळी बोलताना बाळासाहेब थोरात म्हणाले की, ग्रामीण भागात नागरिक, शेतकरी आणि विशेषतः शालेय विद्यार्थी बिबट्याच्या दहशतीखाली जगत आहेत. रात्रीच्या वेळी शेताला पाणी भरण्यासाठी जाणाऱ्या शेतकऱ्यांना आणि शाळेत जाणाऱ्या पाल्यांना मोठा धोका निर्माण झाला आहे. आपल्या भागात वस्त्यांवर नागरिकांचे वास्तव अधिक असल्याने भीतीचे वातावरण जास्त आहे. याप्रकरणी आपण शासनाकडे सातत्याने पाठपुरावा केला असून, वनविभागाची उदासीनता चिंताजनक आहे. प्रशासनाने अधिक सतर्क राहून उपाययोजना केल्या पाहिजेत, तसेच संभाव्य धोके टाळण्यासाठी सर्व शेतकऱ्यांनी आपल्या शेततळ्यांच्या भोवती सुरक्षेसाठी संरक्षक जाळी बसवून घ्यावी, असे आवाहनही त्यांनी केले.

या सांत्वन भेटीदरम्यान गावातील दुसरी घटना असल्याने प्रशासनाने गांभीर्याने लक्ष द्यावे, अशी भावना स्थानिकांनी व्यक्त केली. या प्रसंगी जिल्हा परिषद सदस्य रामहरी कातोरे, पंचायत समिती सदस्य विष्णुपंत रहाटळ, गुलाबराव देशमुख, राजेंद्र कडलग, गिरीश सुर्वे, नानासाहेब वामन, उत्तम सुर्वे, संजय देशमुख, सुरेश कडलग, दत्ता कडलग, गणेश कडलग, सुमित देशमुख, सौरभ कडलग, चेतन देशमुख यांच्यासह गावातील ग्रामस्थ, पदाधिकारी व युवक मोठ्या संख्येने उपस्थित होते.