संगमनेरमध्ये अवैध कत्तलखान्यावर एलसीबीची छापेमारी: १७०० किलो गोमांसासह ११ लाखांचा मुद्देमाल जप्त, चौघांना पकडले!

Annant Ppangarkar

महाराष्ट्र संवाद न्यूज ऑनलाईन:

अहिल्यानगर जिल्ह्यातील अवैध धंद्यांवर वचक बसवण्यासाठी पोलीस अधीक्षक मुम्मका सुदर्शन यांनी दिलेल्या आदेशानुसार स्थानिक गुन्हे शाखेने (LCB) संगमनेर शहरात मोठी कारवाई केली. सुकेवाडी ते समनापूर रस्त्यावरील एका कांद्याच्या चाळीजवळ छापा टाकून पोलिसांनी तब्बल ५ लाख १० हजार रुपये किमतीचे १७०० किलो गोमांस आणि ६ लाख रुपयांचे महिंद्रा पिकअप वाहन (क्र. MH-17-BD-4661) असा एकूण ११ लाख १० हजार रुपयांचा मुद्देमाल जप्त केला.

स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली पीएसआय संदीप दरवडे, पोलीस अंमलदार गणेश लोंढे, विजय ठोंबरे, संतोष खैरे, राहुल डोके, अमृत आढाव, योगेश कर्डीले व भगवान धुळे यांच्या पथकाने ही कारवाई केली.

संगमनेर शहरातील जमजम कॉलनी भागातील अब्दुल हमीद अहमद कुरेशी याने आपल्या राहत्या घराशेजारील शेडमध्ये गोवंशाची कत्तल करून हे गोमांस विक्रीसाठी पांढऱ्या रंगाच्या पिकअपमध्ये भरले असल्याची गुप्त बातमी पोलिसांना मिळाली होती.

मिळालेल्या माहितीच्या आधारे पोलिसांनी सापळा रचून कारवाई करत जमजम कॉलनीतील अब्दुलहमीद अहमद कुरेशी (वय २३), हावडा ब्रीज येथील कलामुद्दीन मिज्जन खान (वय २८, मूळ रा. बहरीच, उत्तर प्रदेश), शिरूर येथील वाहन चालक अरबाज फिरोज खान (वय २४) आणि श्रीरामपूर येथील कैश शबनूर इनामदार (वय २३) या चार आरोपींना ताब्यात घेतले.

या प्रकरणी आरोपींविरुद्ध संगमनेर शहर पोलीस ठाण्यात गुन्हा नोंद (गु.र.नं. ८३९/२०२६) बीएनएस कलम २७१, ३२५, ३(५) तसेच महाराष्ट्र पशुसंरक्षण अधिनियमाच्या विविध कलमांन्वये गुन्हा दाखल करण्यात आला असून, घटनेचा पुढील तपास संगमनेर शहर पोलीस करत आहेत.