कोपरगाव आणि संगमनेरमधील चैन स्नॅचिंगचे गुन्हे उघडकीस; दोन सराईत चोरट्यांकडून ५ लाखांचा मुद्देमाल हस्तगत, अहिल्यानगर एलसीबीची कामगिरी

Annant Ppangarkar

महाराष्ट्र संवाद न्यूज ऑनलाईन –

अहिल्यानगर स्थानिक गुन्हे शाखेने (LCB) धडक कारवाई करत कोपरगाव आणि संगमनेर शहर परिसरातील चैन स्नॅचिंगचे गुन्हे उघडकीस आणले आहेत. या प्रकरणी लोणी परिसरातून दोन सराईत आरोपींना ताब्यात घेण्यात आले असून त्यांच्याकडून ५ लाख १५ हजार रुपये किमतीचा मुद्देमाल जप्त करण्यात आला आहे.

कोपरगाव येथील धारणगाव रोडच्या रहिवासी निलम अजितकुमार नय्यर या ४ सप्टेंबर रोजी आपल्या मुलीसह स्कुटीवरून जात असताना श्रीराम पार्कजवळ अज्ञात दोन आरोपींनी त्यांच्या गाडीला धक्का देऊन खाली पाडले. त्यानंतर आरोपींनी मुलीच्या गळ्यातील सोन्याचे मंगळसूत्र जबरीने चोरून नेले होते. या घटनेप्रकरणी कोपरगाव पोलीस ठाण्यात गुन्हा नोंदवण्यात आला होता.

पोलीस अधीक्षक मुम्मका सुदर्शन यांच्या सूचनेनुसार स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली सहाय्यक पोलीस निरीक्षक विकास जाधव आणि त्यांच्या पथकाने तपास सुरू केला. गुन्ह्याचा तपास करत असताना गुन्ह्यातील संशयित आरोपी लोणी परिसरात असल्याची गुप्त माहिती पोलिसांना मिळाली. त्यानुसार पथकाने सापळा रचून दीप भटु सातपुते आणि मयुर संजय ब्राम्हणे (दोघे रा. लोणी, ता. राहाता) यांना ताब्यात घेतले.

पोलीस चौकशीदरम्यान आरोपींनी कोपरगाव येथील श्रीराम पार्क आणि संगमनेर शहरातील एचडीएफसी बँकेसमोरून महिलांचे मंगळसूत्र चोरल्याची कबुली दिली. आरोपींनी दिलेल्या माहितीवरून कोपरगाव शहर आणि संगमनेर शहर पोलीस ठाण्यातील गुन्हे उघडकीस आले आहेत.

आरोपींनी चोरी केलेले दागिने एका सोनाराला विकले होते. पोलिसांनी संबंधित सोनाराकडे चौकशी केली असता त्याने दागिन्यांची सोन्याची लगड बनवून मित्राकडे ठेवल्याचे स्पष्ट झाले. पोलिसांनी कायदेशीर कारवाई करत पंचांसमक्ष ४ लाख ५० हजार रुपये किमतीची ३० ग्रॅम सोन्याची लगड आणि गुन्ह्यात वापरलेली ६५ हजार रुपये किमतीची होंडा मोपेड (क्रमांक MH-17-GP-6862) असा एकूण ५ लाख १५ हजार रुपयांचा मुद्देमाल जप्त केला.

ताब्यात घेतलेले दोन्ही आरोपी सराईत गुन्हेगार असून त्यांच्यावर यापूर्वीही संगमनेर शहर पोलीस ठाण्यात जबरी चोरीचे गुन्हे दाखल आहेत. पुढील तपासासाठी आरोपींना कोपरगाव शहर पोलिसांच्या स्वाधीन करण्यात आले आहे.