महाराष्ट्र संवाद न्यूज ऑनलाईन-
विजयादशमीच्या शुभमुहूर्तावर संगमनेर शहरात राष्ट्रीय स्वयंसेवक संघाच्या वतीने आयोजित करण्यात आलेल्या शिस्तबद्ध आणि भव्य पथसंचलनाने संपूर्ण शहराचे लक्ष वेधून घेतले. या संचलनाचे मुख्य आकर्षण ठरले ते महायुतीचे संगमनेरचे शिवसेना (शिंदे गट) आमदार अमोल खताळ पाटील. त्यांनी सर्व पद आणि प्रतिष्ठा बाजूला ठेवून एका सामान्य स्वयंसेवकाच्या भूमिकेत या पथसंचलनात पूर्ण वेळ पायी चालत सहभाग नोंदवला.
सकाळच्या सुमारास अकोले नाका येथील शारदा विद्यालयाच्या प्रांगणात शेकडो स्वयंसेवक एकत्र जमले होते. यानंतर अत्यंत शिस्तबद्ध रीतीने पथसंचलनाला प्रारंभ झाला. या संचलनात आमदार अमोल खताळ यांच्यासोबत संघाचे संघचालक सुभाष कोथमीरे, सोपानराव देशमुख आणि इतर प्रमुख पदाधिकाऱ्यांची प्रमुख उपस्थिती होती.
अकोले नाक्यावरून निघालेली ही संचलन फेरी नगरपालिका परिसर, लालबहादूर शास्त्री चौक, रंगार गल्ली, चंद्रशेखर चौक, देवी गल्ली, मेन रोड, माळीवाडा, नेहरू गार्डन, बी.एड. कॉलेज आणि अकोले बायपास रोड अशा प्रमुख मार्गांवरून मार्गक्रमण करत पुढे गेली.
संचलनाच्या संपूर्ण मार्गावर संगमनेरकर नागरिकांनी स्वयंसेवकांवर पुष्पवृष्टी करत त्यांचे स्वागत केले. शहरातील विविध चौकांत नागरिकांनी गर्दी करत संचलनाला प्रतिसाद दिला. विजयादशमी हा संघातर्फे अत्यंत महत्त्वाचा उत्सव मानला जातो. या संचलनाच्या माध्यमातून शिस्त, सामाजिक बांधिलकी, राष्ट्रप्रेम आणि एकजुटीचा प्रभावी संदेश शहरवासीयांना देण्यात आला.
या भव्य पथसंचलनाची सांगता मातोश्री मंगल कार्यालय येथे झाली. आमदार अमोल खताळ पाटील यांच्या प्रत्यक्ष सहभागामुळे या कार्यक्रमाला विशेष राजकीय आणि सामाजिक महत्त्व प्राप्त झाले असून, शहरात या संचलनाची आणि स्वयंसेवकांच्या उत्साहाची जोरदार चर्चा सुरू आहे.