जामिनावर सुटताच मिरवणूक काढणे पडले महाग! ५ जण अटकेत, डीजे मालकही गजाआड; आरोपींची कायद्यानुसार तडीपारी होणार आणि जामीन रद्द करणार

महाराष्ट्र संवाद न्यूज ऑनलाईन –
गंभीर गुन्ह्यांची पार्श्वभूमी असलेले आरोपी जामिनावर सुटल्यानंतर त्यांनी रात्रीच्या वेळी डीजे लावून, रस्त्यावर फटाके फोडत बेकायदेशीरपणे मिरवणूक काढल्याचा धक्कादायक प्रकार श्रीरामपूर शहरात घडला आहे. या घटनेमुळे सार्वजनिक शांतता आणि सुव्यवस्थेला बाधा निर्माण झाल्याने पोलीस प्रशासनाने याची अत्यंत गंभीर दखल घेतली असून, याप्रकरणी पाच आरोपींना अटक करण्यात आली आहे, तर डीजे जप्त करून डीजे मालकालाही गजाआड करण्यात आले आहे.
दत्तनगर आणि टिळकनगर परिसरात घडलेल्या या प्रकरणात बेकायदेशीर जमाव जमवून रस्ता अडवणे, मोठ्या आवाजात डीजे वाजवून सार्वजनिक शांततेचा भंग करणे आणि रॅली काढून दहशत पसरवण्याचा प्रयत्न केल्याप्रकरणी पोलिसांत गुन्हा दाखल करण्यात आला आहे.
श्रीरामपूर पोलीस स्टेशनच्या पथकाने तातडीने कारवाई करत सागर श्रावण भोसले, अमित रविकांत पठारे, संदीप सोपान औटी, देवा किरण साळवे आणि अविनाश सजन गंगावणे यांना ताब्यात घेतले आहे. तसेच डीजे सिस्टीम जप्त करून त्याच्या मालकालाही पोलिसांनी अटक केली आहे.
श्रीरामपूर शहरात शांतता व सुव्यवस्था अबाधित राखण्यासाठी पोलीस प्रशासन पूर्णपणे कटिबद्ध असल्याचे अपर पोलीस अधीक्षक सोमनाथ वाघचौरे यांनी स्पष्ट केले आहे. जामिनावर बाहेर आलेल्या या आरोपींनी न्यायालयाच्या जामीन अटींचे उल्लंघन केले आहे का, याची कसून तपासणी केली जात आहे. अटींचा भंग झाल्याचे निष्पन्न झाल्यास सक्षम न्यायालयात पाठपुरावा करून त्यांचा जामीन रद्द करण्याची प्रक्रिया राबवली जाणार आहे. याशिवाय, या सर्व आरोपींविरुद्ध प्रचलित कायद्यानुसार तडीपारीची कठोर कारवाई केली जाईल, असा इशाराही त्यांनी दिला आहे.
या प्रकरणात सहभागी असलेल्या इतर फरार आरोपींचा शोध घेण्यासाठी पोलिसांची पथके रवाना करण्यात आली असून, त्यांना लवकरच अटक केली जाईल. कायद्याचे उल्लंघन करणाऱ्या कोणत्याही व्यक्तीची आणि गुन्हेगारी प्रवृत्तीची गय केली जाणार नाही, असा सज्जड दम पोलीस प्रशासनाने दिला आहे. ही धडक कारवाई पोलीस अधीक्षक मुम्मका सुदर्शन आणि अपर पोलीस अधीक्षक सोमनाथ वाघचौरे यांच्या मार्गदर्शनाखाली श्रीरामपूर शहर पोलिसांनी केली आहे.