महाराष्ट्र संवाद न्यूज ऑनलाईन-
संगमनेर तालुक्यातील पठारभागाचा अपेक्षित विकास झाला नसल्याची खंत व्यक्त करत, या भागाला जास्तीत जास्त निधी उपलब्ध करून देण्यासाठी कटिबद्ध असल्याची ग्वाही आमदार अमोल खताळ पाटील यांनी दिली.
महालवाडी, जवळे बाळेश्वरची शेंडेवाडी आणि वरुडी पठार येथील ढोरवाडी येथे पालकमंत्री राधाकृष्ण विखे पाटील व आमदार खताळ यांच्या प्रयत्नातून ५३ लाख रुपये खर्चाच्या नवीन विद्युत रोहित्रांचे लोकार्पण करण्यात आले. त्यावेळी आयोजित कार्यक्रमात ते बोलत होते.
याप्रसंगी घारगाव महावितरणचे कनिष्ठ अभियंता संजय थोरात, भाजप युवा मोर्चाचे अध्यक्ष शैलेश फटांगरे यांच्यासह अनेक स्थानिक पदाधिकारी आणि ग्रामस्थ मोठ्या संख्येने उपस्थित होते.
आमदार खताळ म्हणाले की, स्वातंत्र्यानंतरही काही भागांत पुरेसा वीजपुरवठा नसणे दुर्दैवी आहे. आपण मर्यादेपलीकडे जाऊन जनहिताची कामे करत असून दुष्काळाच्या काळात पाणी, वीज आणि रोजगाराचे प्रश्न सोडविण्याला प्राथमिकता देत आहोत. तरुणांसाठी स्थानिक पातळीवर रोजगाराच्या संधी निर्माण करण्याचे आणि रेशनकार्ड व दाखल्यांचे प्रश्न मार्गी लावण्याचे आश्वासन त्यांनी दिले.
तसेच, वंचित शेतकऱ्यांच्या कर्जमाफीची चौकशी करण्याचे संकेतही त्यांनी दिले. पहिल्यांदाच महालवाडीत आगमन झालेल्या आमदार खताळांचे ग्रामस्थांनी फटाक्यांची आतषबाजी, वाजत-गाजत मिरवणूक आणि पुष्पवृष्टी करत उत्साहात स्वागत केले.
दरम्यान, संगमनेर तालुक्यातील ‘जलजीवन’ योजनेचा बट्ट्याबोळ झाल्याचा आरोप करत आमदार खताळ यांनी कामांच्या दर्जावर तीव्र नाराजी व्यक्त केली. अपूर्ण कामांमुळे नागरिकांना पिण्याचे पाणी मिळणे कठीण झाले असून या योजनेची मोठी बदनामी झाली आहे. या संपूर्ण प्रकरणाची आणि ठेकेदारांच्या कार्यपद्धतीची चौकशी व्हावी, यासाठी आगामी हिवाळी अधिवेशनात विधिमंडळात जोरदार आवाज उठवणार असल्याचा इशाराही त्यांनी याप्रसंगी दिला.