महाराष्ट्र संवाद न्यूज ऑनलाईन- संगमनेरमध्ये स्थानिक गुन्हे शाखेची धडक कारवाई; अवैध वाळू वाहतूक करणाऱ्या दोघांवर कारवाई करत १५ लाखांहून अधिकचा मुद्देमाल जप्त करण्यात आला आहे.
संगमनेर शहर पोलीस ठाणे हद्दीतील कासारवाडी-खांडगाव प्रवरा नदीपात्रातून विनापरवाना वाळूची अवैध वाहतूक होत असल्याची गोपनीय माहिती स्थानिक गुन्हे शाखेच्या पथकाला मिळाली होती. या माहितीच्या आधारे पोलिसांनी सापळा रचून नदीपात्रात टिप्परमध्ये वाळू भरत असताना सनी संजय चव्हाण आणि अमोल संजय जोंधळे या दोघांना ताब्यात घेतले. कारवाईदरम्यान पोलिसांनी टाटा कंपनीचा टिप्पर आणि वाळू असा एकूण १५ लाख २० हजार रुपयांचा मुद्देमाल जप्त केला आहे. याप्रकरणी दोन्ही आरोपींविरुद्ध संगमनेर शहर पोलीस ठाण्यात भारतीय न्याय संहितेच्या संबंधित कलमांनुसार गुन्हा दाखल करण्यात आला असून, पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेच्या पथकाने ही कारवाई केली आहे.
