महाराष्ट्र संवाद न्यूज ऑनलाईन- शेतातील मातीचा भराव सुरू ठेवण्यासाठी कारवाईची भीती दाखवून १० हजार रुपयांची लाच मागितल्याप्रकरणी पुणे लाचलुचपत प्रतिबंधक विभागाच्या (एसीबी) पथकाने एका वनपालाला रंगेहात पकडले आहे. जहीर सिराज शेख (वय ४७) असे कारवाई करण्यात आलेल्या संशयित वनपालाचे नाव आहे.
रविवारी (दि. २५) दुपारी माळेगाव येथील हॉटेल शिवकृपा येथे सापळा रचून तक्रारदाराकडून ६ हजार रुपयांची लाच स्वीकारताना ही कारवाई करण्यात आली.
एसीबीने दिलेल्या सविस्तर माहितीनुसार, तक्रारदाराची कोऱ्हाळे खुर्द येथे ४ हेक्टर शेतजमीन आहे. अलीकडील पावसामुळे शेतातील माती वाहून नीरा नदीत गेल्यामुळे त्यांनी नदीपात्रातील माती पुन्हा शेतात टाकण्याचे काम सुरू केले होते. मात्र, गत २६ सप्टेंबर रोजी वनपाल जहीर शेख यांनी हे काम कायदेशीर कारवाईची भीती दाखवून अचानक थांबवले. संबंधित जागा वनविभागाची असल्याचे सांगत मातीचा भराव सुरळीत सुरू ठेवण्यासाठी शेख यांनी स्वतःसह सहकारी भूमरे मॅडम यांच्या नावाखाली १० हजार रुपयांच्या लाचेची मागणी केली होती.
तक्रारदाराच्या दाव्यानुसार, या संपूर्ण लाचेच्या रकमेपैकी ४ हजार रुपये आधीच २६ सप्टेंबर रोजी स्वीकारण्यात आले होते. उर्वरित ६ हजार रुपयांच्या रकमेसाठी वारंवार तगादा लावून ही रक्कम दिल्यानंतरच काम सुरू देण्याची अट घालण्यात आली होती. या प्रकाराला कंटाळून तक्रारदाराने थेट पुणे एसीबी कार्यालयात अधिकृत तक्रार नोंदवली.
या तक्रारीची गंभीर दखल घेत गत २३ ऑक्टोबर रोजी स्वतंत्र पंचांसमक्ष लाचेच्या मागणीची तांत्रिक पडताळणी करण्यात आली. या पडताळणीदरम्यान वनपाल जहीर शेख यांनी यापूर्वी ४ हजार रुपये घेतल्याची कबुली देत, उर्वरित ६ हजार रुपयांची मागणी कायम ठेवल्याचे निष्पन्न झाले.
त्यानुसार, रविवारी एसीबीच्या पथकाने माळेगाव येथील हॉटेल शिवकृपा येथे अत्यंत गोपनीयतेने सापळा रचला. दुपारी ठरल्याप्रमाणे २ वाजून १७ मिनिटांनी तक्रारदाराकडून ६ हजार रुपयांची लाच स्वीकारताना जहीर शेख यांना पथकाने रंगेहात बेड्या ठोकल्या. या प्रकरणी भ्रष्टाचार प्रतिबंधक कायदा १९८८ मधील कलमांतर्गत माळेगाव पोलीस ठाण्यात गुन्हा दाखल करण्यात आला आहे.
सदर धडक कारवाई पुणे एसीबीचे पोलीस उपअधीक्षक सतीश वाळके यांच्या मार्गदर्शनाखाली पोलीस निरीक्षक संतोष पाटील व त्यांच्या पथकाने यशस्वीरीत्या पार पाडली. या गंभीर प्रकारामुळे वनविभागाच्या वर्तुळात मोठी खळबळ उडाली आहे.
