महाराष्ट्र संवाद न्यूज ऑनलाईन- सण-उत्सवांच्या पार्श्वभूमीवर नागरिकांना शुद्ध व सुरक्षित अन्नपदार्थ उपलब्ध करून देण्यासाठी अन्न व औषध प्रशासन विभागाने आक्रमक पावले उचलली आहेत. याच मोहिमेचा भाग म्हणून २४ ऑक्टोबर २०२६ रोजी संगमनेर येथील ‘मेसर्स जगदंबा फूड प्रॉडक्ट्स’ या अन्न प्रक्रिया उद्योगावर धडक कारवाई करत प्रशासनाने तब्बल १५,००,५६६ रुपये मूल्याचा संशयास्पद, मिसब्रँडेड व कमी दर्जाचा अन्नसाठा जप्त केला आहे.
गुजरातच्या उंझा येथील ‘डी. ए. पटेल’ या पुरवठादाराकडून हा माल मागवण्यात आला होता, यामध्ये ८,९९,७०० रुपये किमतीची ५,९९८ किलो धने डाळ आणि ६,००,८६६ रुपये किमतीची ३,५९८ किलो बडीशेप असा एकूण ९,५९६ किलो साठा ताब्यात घेण्यात आला आहे.
राज्याचे अन्न सुरक्षा आयुक्त तुकाराम मुंढे, नाशिक विभागाचे संयुक्त आयुक्त माने आणि सहायक आयुक्त एस. एच. इंगळे यांच्या मार्गदर्शनाखाली अन्न सुरक्षा अधिकारी यु. आर. सूर्यवंशी व त्यांच्या पथकाने ही कारवाई पार पाडली. जप्त केलेल्या साठ्याचे नमुने विश्लेषणासाठी प्रयोगशाळेत पाठवण्यात आले आहे.
अहवाल आल्यानंतर संबंधितांवर कठोर कायदेशीर कारवाई केली जाणार आहे. फेस्टिव्हल ड्राईव्ह २०२६ अंतर्गत सुरू असलेली ही धडक मोहीम अशीच तीव्र गतीने सुरू राहणार असून, सामान्यांच्या आरोग्याशी खेळणाऱ्या कोणत्याही विक्रेत्याची वा व्यावसायिकाची गय केली जाणार नाही, असा स्पष्ट इशारा प्रशासनाकडून देण्यात आला आहे.
