महाराष्ट्र संवाद न्यूज नेटवर्क
राज्यात सत्तारूढ झालेल्या शिंदे फडणवीस सरकारने महाविकास आघाडीच्या निर्णयांना स्थगिती देण्याचा धडका लावला असताना गरिबासाठी अन्नदात्री ठरलेली शिवभोजन थाळी सुरू ठेवण्याचा निर्णय घेतला आहे. मात्र राज्यभरात या थाळ्यांचे यशदा आणि टीस या दोन संस्थांमार्फत ऑडिट केले जाणार आहे.
नवे सरकार अस्तित्वात आल्यानंतर आधीच्या सरकारांच्या निर्णयांना जशी स्थगिती मिळाली तशाच पद्धतीने शिवभोजन थाळी देखील बंद केली जाण्याची चिन्हे होती. मात्र सरकारने मंत्रिमंडळाच्या बैठकीत शिवभोजन थाळी सुरूच ठेवण्याचा निर्णय घेतल्याने या निर्णयाबद्दल समाधान व्यक्त होत आहे.
शिवभोजन थाळी सुरू ठेवण्यासंदर्भात मंत्रिमंडळ बैठकीत निर्णय घेण्यात आला असून प्रत्येक जिल्ह्यात पालकमंत्री शिवभोजन थाळीचा आढावा घेणार आहेत. तसेच राज्यभरात यशोदा आणि टिस संस्था या संदर्भात ऑडिट करतील.
राज्य सरकारकडून शिवभोजन केंद्र चालकांना अनुदान दिले जात होते. ग्रामीण भागातील केंद्रचालकांना एका थाळीमागे 50 रुपये आणि शहरी भागातील थाळी चालकांना 35 रुपये अनुदान देण्यात येत होते. शिवभोजन थाळी योजनेत गैरव्यवहार झाल्याचा शिंदे-फडणवीस सरकारचा संशय आहे. त्यामुळे ही योजना बंद होणार असल्याची चर्चा सुरू होती. या योजनेतंर्गत राज्यातील जनतेला 10 रुपयांत जेवण मिळते. कोरोना काळात याची किंमत 5 रुपये करण्यात आली होती.
महाविकास आघाडी सरकारच्या काळात मुख्यमंत्री उद्धव ठाकरे यांच्या पुढाकाराने ही शिवभोजन थाळी सुरू करण्यात आली होती. राज्यात 1 लाख 88 हजार 463 एवढ्या थाळ्यांची विक्री होते. शिवभोजन थाळीसाठी विविध ठिकाणी केंद्र सुरू करण्यात आली आहेत. ही केंद्र चालवणाऱ्यांना राज्य सरकारकडून विविध मदत दिली जाते. 
अशी आहे शिवभोजन थाळी योजना
गरिबांना, गरजूंना सहज व अत्यल्प दरात भोजन उपलब्ध करण्यासाठी राज्यातील जिल्ह्याच्या ठिकाणी, तालुक्याच्या ठिकाणी केंद्र सुरू करण्यात आले होते. शिवभोजन थाळी केंद्र स्वयंसेवी संस्था, महिला बचतगट, हॉटेल चालक आदींना चालवण्यासाठी देण्यात आली आहेत. शिवभोजन थाळी केंद्र चालकांना राज्य सरकारकडून अनुदान देण्यात येते. शिवभोजन थाळीत एक वाटी भाजी, दोन चपात्या, भात व वरणाचा समावेश आहे.
संगमनेरात या थाळीला वाढदिवसाची गोडी
संगमनेर मधील शिव भोजन केंद्रात या थाळीला वाढदिवसाची गोडी प्राप्त झाली आहे. संगमनेर मधील मान्यवर त्यांच्या वाढदिवसाच्या दिवशी दीड हजार रुपये देऊन वाढदिवस साजरा करत असतात या पैशातून येणाऱ्या सर्वांना जेवण मोफत दिले जाते या थाळीमध्ये एक गोड पदार्थ दिला जातो. त्यामुळे शिवभोजन थाळी सोबत येथे स्वीट डिशदेखील मिळत असते.
