महाराष्ट्र संवाद न्यूज नेटवर्क
काँग्रेस नेते खासदार राहुल गांधी यांनी स्वातंत्र्यवीर सावरकरांविरोधी वक्तव्य केल्याने राज्यात विविध पक्ष त्यांचा निषेध करत असतानाच आता महाराष्ट्र नवनिर्माण सेनेनेही या वादात ऊडी घेतली आहे. राहुल गांधी यांना काळे झेंडे दाखवा असा आदेश मनसे अध्यक्ष राज ठाकरे यांनी कार्यकर्त्यांना दिला आहे.
खासदार राहुल गांधी यांच्या नेतृत्वाखालील भारत जोडो यात्रा उद्या शेगावमध्ये दाखल होत आहे. शेगावमध्ये त्यांच्या सभेचे आयोजन देखील करण्यात आले असून या सभेची जय्यत तयारी केली जात आहे. सावरकर विरोधी वक्तव्य करणाऱ्या गांधी यांना शेगावमध्ये जाऊन काळे झेंडे दाखवा, असे आदेश मनसे प्रमुखांनी दिल्याने उद्या शेगाव मध्ये मनसैनिक मोठ्या संख्येने दाखल होण्याची शक्यता आहे.
“ब्रिटिशांकडून सावरकर पेन्शन घेत होते” असा दावा खासदार राहुल गांधी यांनी कर्नाटकमध्ये त्यांच्या भाषणातून केला आहे. सावरकर यांच्या विषयी त्यांनी केलेल्या वक्तव्यावरून भाजप शिंदे गट यांनी आक्रमक भूमिका घेतली गांधी यांच्या या सावरकर विरोधी विधानाचे पडसाद राज्यात उमटण्याची चिन्हे आहेत. सावरकर यांचे नातू रणजित सावरकर यांनी देखील गांधी यांच्या विरोधात पोलिसात तक्रार केली असून गांधी यांना अटक करण्याची मागणी केली आहे.
दरम्यान शेगाव मध्ये गांधी यांच्या पदयात्रा व सभेवेळी मनसैनिक काळे झेंडे दाखवणार असल्याने कायदा सुव्यवस्थेचा प्रश्न उद्भवण्याची शक्यता निर्माण झाली आहे. या पार्श्वभूमीवर राज्य सरकार काय निर्णय घेते याकडे लक्ष लागले आहे.
