महाराष्ट्र संवाद न्यूज
गुजरातमध्ये सरकार कोणाचे असेल हे येत्या ८ डिसेंबरला ठरणार आहे. पहिल्या टप्प्यातील ८९ जागांसाठी एक डिसेंबरला तर दुसऱ्या टप्प्यात पाच डिसेंबरला मतदान होत आहे. ८९ जागांसाठी होणाऱ्या या निवडणुकीत करोडपती असलेल्या उमेदवारांचा भरणा सर्वाधिक आहे. एक-दोन नव्हे तर तब्बल २११ करोडपती उमेदवार निवडणूक रिंगणात उतरले आहेत.
दिल्लीचे मुख्यमंत्री अरविंद केजरीवाल यांच्या नेतृत्वाखालील आम आदमी पक्ष या वेळच्या निवडणुकीत उतरला असल्याने गुजरातची निवडणूक प्रामुख्याने भाजपा, आम आदमी पार्टी आणि काँग्रेस या तीन मोठ्या पक्षात होत आहे. सुरुवातीपासूनच चुरशीच्या बनलेल्या या निवडणुकीत सत्ता कोणाच्या हाती राहणार याची उत्सुकता असली तरी देखील ही निवडणूक सामान्य माणसाची राहिलेली नाही.
निवडणुकीच्या पहिल्या टप्प्यात होणाऱ्या ८९ जागांसाठी भाजप, आम आदमी पार्टी आणि काँग्रेस या तीन प्रमुख पक्षांच्या उमेदवारांसह तब्बल ७८८ उमेदवार आपले नशीब आजमावत आहे. यातील २११ उमेदवार करोडपती असून ८९ पैकी सर्वाधिक ७९ उमेदवार भारतीय जनता पक्षाकडून निवडणूक रिंगणात उतरले आहेत. त्या खालोखाल काँग्रेसचे ६५ उमेदवार करोडपती आहेत. तर सामान्यांचा पक्ष म्हणून ओळखले जाणारी आम आदमी पार्टीही ८८ जागांवर निवडणूक लढवत आहे. करोडपती उमेदवारांची लागण याही पक्षाला झाली असून त्यांच्याकडून ३३ करोडपती उमेदवार निवडणूक रिंगणात उतरले आहेत. गत निवडणुकीपेक्षा हे प्रमाण यावर्षी अधिक आहे.
पहिल्या टप्प्यात ८९ जागांसाठी ७८८ उमेदवार आपले नशीब आजमावत आहेत. यामध्ये एकूण २११ उमेदवार करोडपती असून एकूण मतदारांपैकी त्यांची टक्केवारी २७ टक्के आहे. २०१७ च्या निवडणुकीत १९८ करोडपती उमेदवार होते. कमी मालमत्ता असलेल्या उमेदवारांची संख्या ३४३ इतकी आहे. त्यातही गेल्या निवडणुकीच्या तुलनेत ४३ टक्के वाढ झाली आहे. 
म्हणजेच यावेळी निवडणुकीत मातब्बर उमेदवार बाजी मारत आहेत. उमेदवारांच्या एकूण संपत्तीचा विचार करता गुजरात निवडणुकीच्या पहिल्या टप्प्यातील उमेदवारांची सरासरी संपत्ती २.८८ कोटी रुपये आहे. गेल्या निवडणुकीच्या तुलनेत या आकडेवारीत वाढ झाली आहे. २०२७ च्या विधानसभा निवडणुकीत ९२३ उमेदवारांची सरासरी मालमत्ता २.१६ कोटी रुपये होती.
