महाराष्ट्र संवाद न्यूज
रस्त्यातील खड्ड्यांपाठोपाठ आता भाजपने क्रीडा संकुलाकडे लक्ष केंद्रीत केले आहे. नगरपालिकेत भाजपची सत्ता आल्यास सहकार महर्षी भाऊसाहेब थोरात क्रीडा संकुलाचे नांव बदलून ते ‘छत्रपती शिवाजी महाराज क्रीडा संकुल’ असे केले जाणार असल्याची माहिती माजी उपनगराध्यक्ष, भारतीय जनता पक्षाचे नेते जावेद जहागिरदार यांनी दिली.
जहागिरदार म्हणाले, संगमनेर नगरपालिकेत ३० वर्षांपासून माजी महसूल मंत्री आमदार बाळासाहेब थोरात व नाशिक पदवीधर मतदार संघाचे आमदार डॉ. सुधीर तांबे यांच्या अधिपत्याखाली कॉग्रेसची सत्ता आहे. त्यावेळी मोठा गाजावाजा करत नगरपालिकेने सुमारे पाच एकर परिसरामध्ये क्रीडा संकुलाची उभारणी केली आहे. यासाठी कोट्यावधी रुपयांचा खर्च करण्यात आला. संगमनेर नगरपालिकेचे क्रीडा संकुल ही शासकीय मालमत्ता आहे. ते शासकीय निधीतून उभे राहीले आहे. या संकुलाला सत्ताधाऱ्यांनी सहकार महर्षी भाऊसाहेब थोरात क्रीडा संकुल असे नांव दिले आहे. 
क्रीडा संकुलाचा फायदा संगमनेरमधील खेळाडूंना होईल, या मैदानावर मोठमोठ्या स्पर्धा भरविण्यात येतील, असे त्यावेळी सत्ताधाऱ्यांनी सांगीतले होते. प्रत्यक्षात मात्र तसे काहीही घडतांना दिसत नाही. युवक कॉग्रेसचे माजी प्रदेशाध्यक्ष सत्यजीत तांबे यांच्या नेतृत्वाखाली होणाऱ्या क्रिकेट स्पर्धेचा अपवाद वगळता सामान्य क्रीडा पट्टुंसाठी या क्रीडा संकुलाचा फारसा उपयोग होत नाही. याशिवाय या क्रीडा संकुलापासून नगरपालिकेला फारसे उत्पन्नदेखील मिळत नाही. येत्या काळात या क्रीडा संकुलाचा सामान्य खेळाडुंना उपयोग व्हावा, यासाठी आमचा प्रयत्न राहणार आहे. सत्ताधाऱ्यांनी आपली खासगी मालमत्ता समजुन या क्रीडा संकुलाचा उपयोग केला असल्याचा आरोप त्यांनी केला आहे.
थोरात यांच्या नावाबद्दल आम्हाला आदर आहे, मात्र सत्ताधाऱ्यांनी हे नांव शासकीय मालमत्तेला देण्याऐवजी ते खासगी मालमत्ता अथवा एखाद्या संस्थेला द्यावे, असे सांगत आगामी पालिका निवडणुकीत संगमनेरकरांनी भारतीय जनता पक्षाला कौल दिल्यास या क्रीडा संकुलाचे नांव बदलून ते ‘छत्रपती शिवाजी महाराज क्रीडा संकुल’ केले जाईल, असे जहागिरदार यांनी म्हटले आहे.
