महाराष्ट्र संवाद न्यूज
आज सत्ता असल्यानं तुमच्याकडे सुरक्षा व्यवस्था आहे. तुम्ही आमची सुरक्षा काढली. आम्ही एकटं फिरतोय मर्दासारखं. आम्ही म्हणतो का सुरक्षा द्या म्हणून? आम्हाला कोणी हात लावतंय का? तुम्हीदेखील सुरक्षेशिवाय फिरण्याची हिंमत दाखवा. तुम्ही सुरक्षेत फिरताय याचा अर्थ तुम्हाला भीती आहे. जनता खवळलेली आहे, असा हल्लाबोल संजय राऊत यांनी केला आहे.
शिवसेना उद्धव बाळासाहेब ठाकरे पक्षाचे खासदार संजय राऊत शुक्रवारी नाशिक दौऱ्यावर आले या दौऱ्या दरम्यान झालेल्या पत्रकार परिषदेत त्यांनी एकनाथ शिंदे गटावर पुन्हा एकदा हल्लाबोल केला आहे. हिंमत असेल तर सुरक्षेविना फिरून दाखवा, असा इशाराच त्यांनी बंडखोरांना दिला आहे. आम्ही बघा सुरक्षेविना बिनधासत्पणे फिरू शकतोय, असंही ते म्हणाले.
गद्दारांपैकी कोण काय बोलतंय याचं मला काही पडलेलं नाही. ४० नेते गेले असले तरी पक्ष तिथंच आहे. पालापाचोळा उडून गेल्यानं शिवसेनेला फरक पडत नाही. तुम्ही कितीही खोके द्या. जनता खोक्याला विकली जात नाही हे लक्षात ठेवा.
मी गद्दार किंवा खोकेवाल्यासांठी पत्रकार परिषद घेतली नाही. यांच्या कपाळावर गद्दारीचा शिक्का बसला आहे. जसं दिवार सिनेमात अमिताभच्या हातावर गोंदलं होतं, मेरा बाप चोर है, तसं यांचे नातेवाईक, यांचे पोरं यांच्या बायका यांना उद्या लोकं म्हणतील हे गद्दारांचे नातेवाईक आहेत. त्यांच्या कपाळावर गद्दारीचा शिक्का बसला आहे. यांच्या पिढ्या न पिढ्यांना ही गद्दारी शांतपणे बसू देणार नाही. 
जे आमदार खासदार शिवसेनेतून बाहेर पडले आहे त्यांनी, पुन्हा निवडून येऊन दाखवावे. नारायण राणे यांना मी महत्त्व देत नसून त्यांच्यावर बोलण्याची गरज नसल्याचे त्यांनी सांगितले. कर्नाटकच्या मुख्यमंत्र्यांनी पाणी सोडले, त्या चुल्लूभर पाण्यात मुख्यमंत्र्यांनी डूबून मरावे. शेजारच्या राज्यातील मुख्यमंत्री तुम्हाला डिवचत आहे. असं अतिक्रमण याआधी कधीही झालेलं नाही. कर्नाटकचे मुख्यमंत्री रोज सरकारला आव्हान देत आहेत. आता कुठे गेला तुमचा स्वाभिमान असा सवाल त्यांनी बंडखोर शिंदे गटाला केला.
याच स्वाभिमानाचा मुद्द्यावर तुम्ही शिवसेना सोडलीय ना, आता शिवरायांचा अपमान होतोय तर मग तुम्ही शांत का? असा सवाल करत त्यांनी यावेळी विविध मुद्द्यांवर त्यांनी आक्रमकपणे आपली मते मांडली.
शिंदे गटात होणार मोठा स्फोट
संजय राऊत यांनी पत्रकार परिषदेमध्ये शिंदे गटात मोठा स्फोट होणार असल्याचा दावा केला आहे. ते म्हणाले, मी खासदार असलो तरी त्या अगोदर एक क्राईम रिपोर्टर आहे. माझा पिंड पत्रकाराचा आहे. त्यामुळे कोणाच्या डोक्यात काय सुरू आहे, ते मला चांगलं समजतं. शिंदे गटात काय सुरू आहे हे मला माहिती आहे त्याचा लवकरच स्फोट होईल असं देखील ते म्हणाले.
