३७ पैकी थोरात गटाचे २६, विखे गटाचे ९ तर २ ठिकाणी अपक्ष सरपंच
महाराष्ट्र संवाद न्यूज
संगमनेर तालुक्यामध्ये रविवारी ३७ ग्रामपंचायतीसाठी निवडणूक झाली. मंगळवारी झालेल्या मतमोजणीनंतर तालुक्याचे गाव कारभारी स्पष्ट झाले. तालुक्यातील बहुसंख्य ग्रामपंचायतीवर राज्याचे माजी महसूल मंत्री बाळासाहेब थोरात यांच्या गटाने आपले वर्चस्व कायम राखले आहे. मात्र महसूल मंत्री राधाकृष्ण विखे यांनीही संगमनेरची निवडणूक प्रतिष्ठेची केल्याने नऊ ग्रामपंचायतीमध्ये सरपंच पदी त्यांच्या गटाच्या उमेदवारांना यश मिळाले आहे.
मतमोजणीनंतर मिळालेल्या माहितीनुसार 37 पैकी 26 ग्रामपंचायतीमध्ये राज्याचे माजी महसूल मंत्री बाळासाहेब थोरात यांच्या नेतृत्वाखालील शेतकरी विकास मंडळाचे, तर नऊ ग्रामपंचायतीमध्ये महसूल मंत्री राधाकृष्ण विखे पाटील यांच्या नेतृत्वाखालील आणि दोन ग्रामपंचायतीमध्ये अपक्ष सरपंचांनी बाजी मारली. विशेष म्हणजे अपक्ष निवडून आलेल्या दोन्हीही महिला आहेत. तर तालुक्यातील बहुसंख्य ग्रामपंचायतीमध्ये शेतकरी विकास मंडळाचे उमेदवार मोठ्या संख्येने विजयी झाले आहेत. काही ठिकाणी दोन्ही गटांनी एकमेकांना धक्का-प्रतिधक्का दिल्याचे बघावयास मिळाले.
संगमनेर तालुक्यामध्ये ग्रामपंचायत निवडणुका जाहीर झाल्यानंतर आजी-माजी महसूल मंत्र्यांमध्ये संघर्ष बघावयास मिळाला. राज्याचे विद्यमान महसूल मंत्री राधाकृष्ण विखे पाटील यांनी संगमनेर तालुक्यातील ग्रामपंचायत निवडणुकीत विशेष लक्ष घातल्याने महसूल मंत्री बाळासाहेब थोरात यांच्या जोर्वे गावासह तळेगाव, कनकापूर, कोल्हेवाडी, निंबाळे, निमोण, मालुंजे, रहीमपूर आणि सादतपूर येथील सरपंचपदी विखे गटाच्या जनसेवा मंडळाच्या उमेदवारांची वर्णी लागली असल्याची माहिती मिळते. तर महत्वपूर्ण असलेल्या घुलेवाडीसह निळवंडे येथील सरपंचपदी दोन्ही अपक्ष महिला विजयी झाल्या आहेत. निळवंडे येथे प्रसिद्ध कीर्तनकार निवृत्ती महाराज देशमुख यांच्या सासुबाई शशिकला पवार निवडून आल्या आहेत.
तर डोळासने व सायखिंडी येथे बिनविरोध निवडून आलेले सरपंच शेतकरी विकास मंडळाचे असून याशिवाय अंभोरे, उंबरी बाळापूर, ओझर खुर्द, करुले, कर्जुले पठार, कोळवाडे, खराडी, चिंचोली गुरव, चिकणी, जांबुत बुद्रुक, जांभूळवाडी, दरेवाडी, धांदरफळ खुर्द, धांदरफळ बुद्रुक, निमगाव भोजापूर, निमगाव जाळी, पिंपरणे, पोखरी हवेली, रणखांबवाडी, वडझरी खुर्द, वडझरी बुद्रुक, वाघापूर, साकुर आणि हंगेवाडी येथे शेतकरी विकास मंडळाचे उमेदवार सरपंचपदी विजयी झाले आहेत. सरपंच आणि सदस्य पदी बहुतांशी ग्रामपंचायतीमध्ये थोरात गटाने वर्चस्व मिळविले असले तरी काही ग्रामपंचायती थोरात गटाकडून मिळविण्यात विखे गटाला यश आले आहे. आगामी जिल्हा परिषद पंचायत समिती निवडणुकीच्या दृष्टीने या निवडणुका महत्त्वपूर्ण ठरणाऱ्या आहेत.
असे आहेत नवे सरपंच
पिंपरणे : नारायण मरभळ (थोरात गट)
ओझर खुर्द : गिरिजा साबळे (थोरात गट)
निमोण : संदीप देशमुख (विखे गट)
अंभोरे : सुरेखा खेमनर (थोरात गट)
हंगेवाडी : कमल कांगणे (थोरात गट)
कनकापूर : ज्योती पाचपिंड (विखे गट)
निंबाळे : भगीरथाबाई काठे (विखे गट)
वडझरी बुद्रुक : संध्या गोरडे (थोरात गट)
वडझरी खुर्द : पांडुरंग सुपेकर (थोरात गट)
कोळवाडे : पुष्पा गुंजाळ (थोरात गट)
जांभुळवाडी : शांताबाई कुदनर (थोरात गट)
रणखांबवाडी : बाबाजी गुळवे (थोरात गट)
पोखरी हवेली : सुदाम खैरे (थोरात गट)
निमगाव भोजापूर : ज्योती कडलग (थोरात गट)
कोल्हेवाडी : सुवर्णा दिघे (विखे गट)
मालुंजे: सुवर्णा घुगे (विखे गट)
जोर्वे : प्रीती दिघे (विखे गट)
उंबरी बाळापुर: अर्चना भुसावळ (थोरात गट)
चिकणी : गायत्री माळी (थोरात गट)
सायखिंडी : नीलम पारधी (थोरात गट)
चिंचोली गुरव : विलास सोनवणे (थोरात गट)
निळवंडे : शशिकला पवार (अपक्ष)
कर्जुले पठार : रोहिणी भागवत (थोरात गट)
खराडी : ज्योती पवार (थोरात गट)
वाघापूर : स्मिता शिंदे (थोरात गट)
साकुर : सचिन सोनवणे (थोरात गट)
करुले : बाळासाहेब आहेर (थोरात गट)
सादतपूर : नारायण गुंजाळ (विखे गट)
रहिमपूर : सविता शिंदे (विखे गट)
तळेगाव दिघे : उषा दिघे (विखे गट)
डोळसणे : मंगल काकड (थोरात गट)
धांदरफळ बुद्रुक : उज्वला देशमाने (थोरात गट)
धांदरफळ खुर्द : लता खताळ (थोरात गट)
घुलेवाडी : निर्मला राऊत (अपक्ष)
निमगाव जाळी : प्रतिभा जोंधळे (थोरात गट)
दरेवाडी : आनंदा दरगुडे (थोरात गट)
जांबुत बुद्रुक : सोनाली शेटे (थोरात गट)
