महाराष्ट्र संवाद न्यूज नेटवर्क
संगमनेर : सहकार महर्षी भाऊसाहेब थोरात यांचे विचार सातत्याने प्रेरणास्त्रोत राहिले आहे. त्यांच्या आदर्श विचारावर सहकाराच्या माध्यमातून संगमनेर समृद्ध झाले आहे. येथील सहकार देशासाठी दिशादर्शकाचे काम करत असल्याचे गौरवोद्गार नाशिक पदवीधर मतदारसंघाचे आमदार डॉ. सुधीर तांबे यांनी काढले.
अमृत उद्योग समूहाच्यावतीने कारखाना कार्यस्थळावरील प्रेरणास्थळ येथे स्वातंत्र्यसेनानी भाऊसाहेब थोरात यांना अभिवादन करण्यात आले. यावेळी ते बोलत होते. यावेळी दुर्गाताई तांबे, सत्यजित तांबे, रणजीतसिंह देशमुख, कॅन्सरतज्ञ डॉ. जयश्री थोरात, कार्यकारी संचालक जगन्नाथ घुगरकर यांच्यासह अमृत उद्योग समूहातील विविध संस्थांचे पदाधिकारी, कार्यकर्ते उपस्थित होते. भाऊसाहेब थोरात या नावाने तालुक्यात गावोगावी प्रेरणा दिन साजरा करण्यात आला.
तांबे म्हणाले, सहकारात अलौकिक कार्याचा पाया घालणाऱ्या भाऊसाहेब थोरात यांचे विचार हे कायम प्रेरणास्त्रोत राहिले आहे. त्यांच्याच विचारावर संगमनेरमधील कार्यकर्ते सदैव काम करत आहेत. त्यांचा हाच सेवाभावी विचार देशातील सहकारासाठी मार्गदर्शक ठरला. थोरात यांचा जन्मदिन तालुक्यात प्रेरणा दिन म्हणून मोठ्या उत्साहात साजरा होत असतो. आधुनिकता, शिस्त, काटकसर व पारदर्शकता ही तत्वे त्यांनी सहकारात रुजविली.
थोरात यांनी स्वातंत्र्यप्राप्तीनंतर गोरगरीब व सर्वसामान्यांच्या जीवनात आनंद निर्माण करण्यासाठी सहकाराचा मार्ग निवडला. थोरात यांच्या तत्त्वांमधून संगमनेरचा सहकार फुलला. काँग्रेस विधिमंडळ पक्षनेते आमदार बाळासाहेब थोरात यांच्या नेतृत्वाखाली आज संगमनेरचा सहकार हा देशासाठी दिशादर्शक ठरला आहे. दुष्काळी तालुका ते प्रगतशील तालुका यामध्ये विविध संस्थांची उभारणी, रचनात्मक कार्य, गोरगरिबांच्या आर्थिक सामाजिक विकास हे महत्त्वाचे काम तीर्थरूप भाऊसाहेब थोरात यांनी केले. वयाच्या 84 वा वर्षी पर्यावरणाचे काम करताना त्यांनी दंडकारण्य अभियान राबवले. त्याचबरोबर सर्वसामान्यांच्या आरोग्याची काळजी घेण्याकरता एसएमबीटी सेवाभावी ट्रस्टच्या माध्यमातून मोठे हॉस्पिटल सुरू केले. आज हे हॉस्पिटल उत्तर महाराष्ट्रातील अनेक गरजूंसाठी आरोग्य मंदिर ठरले आहे.
तालुक्यातील प्रत्येक गावात प्रेरणा दिन साजरा
सहकार महर्षी भाऊसाहेब थोरात यांचा जन्मदिन 12 जानेवारी हा संगमनेर तालुक्यातील प्रत्येक गावात प्रेरणा दिन म्हणून मोठ्या उत्साहात साजरा होतो. विविध ठिकाणी निबंध स्पर्धा, वकृत्व स्पर्धा, प्रभात फेरी आदी उपक्रमांचे आयोजन करून त्यांना अभिवादन करण्यात आले. याचबरोबर सहकारमहर्षी भाऊसाहेब थोरात सहकारी साखर कारखान्याच्या वतीने अमृतेश्वर मंदिर प्रांगणात भव्य रक्तदान शिबिराचे आयोजनही करण्यात आले होते.
