महाराष्ट्र संवाद न्यूज नेटवर्क
संगमनेर : महाराष्ट्र शिक्षक लोकशाही आघाडीने (टिडीएफ) नाशिक पदवीधर मतदारसंघात विद्यमान आमदार आणि महाविकास आघाडीचे उमेदवार डॉ. सुधीर तांबे यांना पुरस्कृत केले होते. मात्र तांबे यांनी उमेदवारी अर्ज दाखल केला नाही. त्यामुळे निवडणुकीत कोणाला पुरस्कृत करावयाचे याचा निर्णय राज्य कार्यकारिणी घेणार आहे. तोपर्यंत सभासदांनी कार्यकारिणीच्या निर्णयाची प्रतीक्षा करण्याचे आवाहन संघटनेचे अध्यक्ष विजय बहाळकर व हिरालाल पगडाल यांनी केले आहे.
या संदर्भात पगडाल यांनी एका प्रसिद्धी पत्रकाद्वारे महाराष्ट्र संवाद न्यूजला ही माहिती दिली आहे. ते म्हणाले, नासिक विभाग पदवीधर मतदार संघाच्या निवडणुकीत टिडीएफने डॉ. सुधीर तांबे पुरस्कृत केले होते, परंतु त्यांनी उमेदवारी अर्जच दाखल न केल्याने या मतदारसंघात असाधारण परिस्थिती निर्माण झाली आहे. डॉ. तांबे हे टिडीएफच्या पाठिंब्यावर या मतदार संघात तीन वेळा विजयी झाले होते व त्यांनी टिडीएफच्या ध्येयधोरणानुसार कामकाज केले होते.
आमदार तांबे यांनी यावेळी देखील टिडीएफकडे समर्थन मागणारा लेखी अर्ज केला होता, टिडीएफच्या राज्य कार्यकरिणीने त्यांची विनंती मान्य करून त्यांना पुरस्कृत करण्याचा निर्णय घेतला होता. मात्र उमेदवारी अर्ज दाखल करण्याच्या शेवटच्या क्षणापर्यंत महाविकास आघाडी कडून उमेदवारी मिळवून देखील डॉ. तांबे यांनी आपला उमेदवारी अर्ज दाखल केला नाही.
त्यामुळे या मतदारसंघात वेगळी परिस्थिती निर्माण झाली आहे. निर्माण झालेल्या या परिस्थितीची दखल टिडीएफने घेतली असून या मतदारसंघात कोणत्या उमेदवाराला पुरस्कृत करावयाचे यासंबंधी लवकरच राज्य कार्यकारिणीची बैठक घेऊन धोरण जाहीर केले जाणार आहे. तोपर्यंत सभासदांनी संघटनेच्या निर्णयाची प्रतीक्षा करण्याचे आवाहन शिक्षक लोकशाही आघाडीचे अध्यक्ष विजय बहाळकर व कार्यवाह हिरालाल पगडाल यांनी केले आहे.
आमदार डॉ. तांबे यांच्या ऐवजी त्यांचे चिरंजीव सत्यजित तांबे यांनी या मतदारसंघात अपक्ष उमेदवारी अर्ज दाखल केला आहे. या मतदारसंघात महाविकास आघाडी अथवा भारतीय जनता पक्षाकडून अधिकृत उमेदवार नसल्याने शिक्षक लोकशाही आघाडी सत्यजित तांबे यांना पुरस्कृत करते की अन्य कोणत्या उमेदवाराला याबाबत काय निर्णय घेते याकडे सभासदांचे लक्ष लागले आहे.
