महाराष्ट्र संवाद न्यूज नेटवर्क
संगमनेर : साकुर-शिबलापुर रस्त्यावर मृत अवस्थेत आढळलेल्या बिबट्याचा बछड्याचा मृत्यू वाहनाच्या धडकेने झाला नसून तरसाच्या हल्ल्यात झाल्याचे समोर आले आहे.
बुधवारी सकाळी साकुर शिबलापुर रस्त्यावर जिजाबा नागरे यांच्या शेतजमिनीलगत बिबट्याचे एक पिल्लू झोपलेल्या आवश्यक दिसले. त्यामुळे नागरिकांनी थोडे जवळ जात त्याचे निरीक्षण केले असता त्याच्या तोंडातून रक्तस्राव झाला असल्याचे आणि तो मृत असल्याची शंका आल्याने याची माहिती तातडीने वनविभागाच्या अधिकाऱ्यांना देण्यात आली.
घटनास्थळी आलेल्या वनविभागाच्या अधिकाऱ्यांनी बिबट्याचे बछडे चार महिने वयाचे असल्याचा आणि त्याचा मृत्यू झाल्याचा निष्कर्ष काढला. मृत बछड्याला ताब्यात घेत त्याची वन विभागाच्या अधिकाऱ्यांनी उत्तरे तपासणी केली असता या बछड्याचा मृत्यू हा वाहनाच्या धडकेने झाला नसून तरसाच्या हल्ल्यात झाला असल्याचा निष्कर्ष काढला आहे.
अवघ्या चार महिन्याच्या या बछड्याला अद्याप शिकारीची माहिती नसल्याने तरसाच्या हल्ल्यात तो मृत झाला असल्याचे वनविभागाच्या अधिकाऱ्यांनी म्हटले आहे.
संगमनेर तालुक्यात बिबट्यांचा वावर मोठ्या प्रमाणात वाढला असून भक्षक झालेले बिबटे माणसांवर तसेच लहान बालकांवर हल्ले करत आहेत. बुधवारी रस्त्यावरच बिबट्याचे चार महिन्याचे बछडे मृत अवस्थेत आढळल्याने शिबलापूर, पानोडी, आश्वी, उंबरी बाळापुर, पिंपरी आदीसह प्रवरा नदी पट्ट्यात घबराटीचे वातावरण निर्माण झाले आहे.
संगमनेर शहरालगतही बिबट्याचा वावर असल्याचे समोर आले आहे. काही दिवसांपूर्वी एका चार वर्षाच्या बालकावर बिबट्याने हल्ला केल्याची घटना ताजी असतानाच दोन दिवसांपूर्वी एका गाईने बिबट्याला पळवून लावल्याचा व्हिडिओ समाज माध्यमात फिरत आहे. वनविभागाच्या अधिकाऱ्यांनी परिसराची पाहणी केली असली तरी या बिबट्याला पकडण्यात अद्याप यश आलेले नाही. नागरिकांनी सावध राहण्याचे आवाहन वनविभागाच्या अधिकाऱ्यांनी केले आहे.
