महाराष्ट्र संवाद न्यूज नेटवर्क
महाविकास आघाडीने एका पत्रकार परिषदेद्वारे आपले विधान परिषदेचे उमेदवार जाहीर केले आहे. बहुचर्चित ठरलेल्या नाशिक पदवीधर मतदारसंघांमध्ये अपक्ष उमेदवार सत्यजित तांबे यांना काँग्रेसमधून निलंबित करण्यात आले असून शुभांगी पाटील या मविआच्या उमेदवार असल्याचे जाहीर करण्यात आले आहे.
नाशिकमध्ये महाविकास आघाडीची उमेदवारी विद्यमान आमदार डॉ. सुधीर तांबे यांना देण्यात आली होती मात्र तांबे यांनी आपला उमेदवारी अर्ज दाखल न करता मुलगा आणि युवक काँग्रेसचे माजी प्रदेशाध्यक्ष सत्यजित तांबे यांचा अपक्ष उमेदवारी अर्ज दाखल केल्यानंतर या मतदारसंघात मोठे राजकीय रणकंदन माजले. आमदार तांबे यांचे निलंबन केल्यानंतर शिवसेनेने या मतदारसंघात भारतीय जनता पक्षाकडून इच्छुक असलेल्या अपक्ष उमेदवार ॲड. शुभांगी पाटील यांना पाठिंबा दर्शविला होता. या पार्श्वभूमीवर काँग्रेस आणि राष्ट्रवादी काँग्रेस काय निर्णय घेते याकडे उमेदवारासह पदवीधरांचे लक्ष लागले होते.
महाविकास आघाडीच्या नेत्यांची आज मुंबईमध्ये संयुक्त पत्रकार परिषद झाली. या पत्रकार परिषदेत काँग्रेसचे प्रदेशाध्यक्ष नाना पटोले, राष्ट्रवादी काँग्रेसचे जितेंद्र आव्हाड आणि शिवसेनेचे अंबादास दानवे उपस्थित होते. या पत्रकार परिषदेत सत्यजित तांबे यांच्यावर निलंबनाची कारवाई करण्यात आल्याची माहिती देण्यात आली. तसेच शुभांगी पाटील यांचे नावावर एकमत झाल्याचे नाना पटोले यांनी यावेळी जाहीर केले.
त्यामुळे प्रचारात सुरुवातीपासूनच आघाडीवर असलेले आणि शिक्षक संघटनांचा पाठिंबा मिळविलेले अपक्ष उमेदवार सत्यजित तांबे यांच्यासमोरील तिढा वाढला असून त्यांना भारतीय जनता पार्टी पुरस्कृत करणार का? तांबे भाजपात प्रवेश करणार असे प्रश्न उपस्थित होत आहे.
महाविकास आघाडीचे राज्यातील उमेदवार पुढील प्रमाणे :
नागपूर – सुधाकर आडबोले
अमरावती – धीरज लिंगाडे
औरंगाबाद – विक्रम काळे
नाशिक – शुभांगी पाटील
कोकण- बाळाराम पाटील
